Muze Falau evwile ngwo A-Izalele hatuhuka mu Engitu, iye yanenganyana ha kweecha hanga aye kwo. Chocho, yalweza tujita twenyi ngwenyi: ‘Luliekenu matemba jami eswe a jita hanga tukaule A-Izalele! Kachi te kutweechele hanga aye.’ Iye hamwe ni tujita twenyi yaputuka kukaula A-Izalele.

Yehova te kanasongwela atu jenyi ha kuzachisa lelwa mu mwalwa, alioze ha ufuku kahia. Yaasongwela ndo ku Kalunga-Lwiji Muchila, yaalweza hanga atunge chilombo.

Hachino, A-Izalele yamona Falau ni tujita twenyi kanaakaula. Ayo yapwa mukachi ka kalunga-lwiji ni tujita twa A-Engitu. Ayo yaputuka kukololoka kuli Mose ngwo: ‘Kumutufwa kwetu! Kachi watwechanga mu Engitu.’ Alioze Mose yaamba ngwenyi: ‘Kanda nwivwa woma. Shimbwilenu hanga numone chize Yehova manulamwina.’ Mose kanakafuliela muli Yehova, nyi ngwami?

Yehova yalweza A-Izalele hanga akatuke ha chilombo. Ha ufuku wacho, Yehova yasa lelwa mukachi ka A-Engitu ni A-Izalele. Sali lia A-Engitu yikupwa milima. Alioze sali lia A-Izalele, yikupwa pangu.

 Yehova yalweza Mose hanga amike kwoko lienyi ha kalunga-lwiji. Mba Yehova yatuma chijimbi chinene ha ufuku weswe. Chocho, kalunga-lwiji yaliteta mu yipinji yaali ni kuhichika yimwe jila hakachi. A-Izalele eswe yapalika hashi homu ni kuya sali likwo mukachi ka yikalakala ya meya.

Tujita a Falau yakaula A-Izalele mu jila yoyene yomu mu kalunga-lwiji. Hachino, Yehova yaalumbanganyisa. Chocho, tufumbo a matemba jo yaputuka kusepuka. Maswalele yaputuka kukololoka ngwo: ‘Tutuhukenu muno! Mumu Yehova kanaakwase.’

Yehova yalweza Mose ngwenyi: ‘Mika kwoko lie ha kalunga-lwiji.’ Hohene, yikalakala ya meya yiyifuka tujita eswe A-Engitu. Falau ni atu jenyi eswe yafwa. Kushi ni umwe hakachi ko unakalilamwina.

Sali likwo lia kalunga-lwiji, mbunga yinene ya atu yaputuka kuhalisa Yehova ni mwaso ngwo: “Mungwimbila Yehova mwaso, mumu iye hanangama kuhiana. Tuvwalu ni akwa kwaendesa yaanyasa mu kalunga-lwiji.” Muze atu te anembi mwaso, mapwo te kanahangana ni kwimba mikupiela. Mutu mweswe kapwile ni chiseke mumu te hapwa ni shindakenyo ngwo kaatusula mu undungo.