De Pharao ghört, dass d Israelite us Ägypte weg sind. Da änderet er sini Meinig und befihlt sine Soldate: «Mached alli mini Chriegswäge parat, mir göhnd ihne nache, mir hätted si nid dörfe la gah.» Denn verfolgt er zäme mit sine Soldate d Israelite.

Jehova füehrt sis Volk. Am Tag brucht er für das e Wolke und i de Nacht es Füür. Er füehrt si zum Rote Meer und seit ihne dört, dass si ihres Lager sölled ufbaue.

Glii druf abe gsehnd d Israelite, wie de Pharao und sini Armee immer nöcher chömmed. Jetzt sitzed si i de Falle: Hinder ihne sind d Ägypter und vor ihne isch s Rote Meer. D Israelite gebed em Moses d Schuld für das alles und säged: «Jetzt müend mir sterbe, du hättisch üs gschiider in Ägypte glaa.» Aber de Moses seit: «Ihr müend kei Angscht ha, warted ab und lueged, wie Jehova üs rette wird.» De Moses vertraut Jehova würklich, findsch du das au?

Jetzt seit Jehova zu de Israelite, si sölled s Lager zämeruume. I dere Nacht tuet Jehova d Wolke zwüsche d Ägypter und d Israelite. Uf de Siite vo de Ägypter isch es dunkel und uf de Siite vo de Israelite isch es hell.

Jehova seit em Moses, er söll sin Stab über s Meer usehebe. Denn macht Jehova, dass es di ganzi Nacht fescht windet und sich drum s Meer teilt. Eso gits en Weg zmizt dur s Meer dure. All di Millione vo Israelite laufed uf em trochne Bode zwüsche de Wasserwänd uf di anderi Siite übere.

Em Pharao sini Armee nimmt au de Weg dur s Meer und eso chömmed si de Israelite immer no nöcher. Denn bringt Jehova di ganzi Armee durenand. Vo ihrne Wäge gheied d Räder ab. D Soldate schreied: «Mir müend weg vo da! Jehova kämpft für d Israelite!»

Da seit Jehova zum Moses: «Heb dini Hand über s Meer use.» Sofort stürzed d Wasserwänd über de Ägypter ii. De Pharao und sini ganzi Armee sterbed. Kei Einzige überlebt.

Am andere Ufer singed alli zäme für Jehova es Loblied, zum ihm Danke z säge und ihn azbete: «Singed für Jehova es Lied. Wil er isch de Höchscht. Er het d Ross und alli Riiter is Meer gschlüderet.» D Fraue tüend zu dem Lied tanze und Tamburin spile. Alli sind richtig glücklich, wil jetzt sind si würklich frei.