Wanaa sümaa naapüin faraón noʼunuin na israeliitakana Egiptojee, isasü naaʼin süchiirua nüjütüin naya. «Jüsaaja tü weʼejena watkaayakat, woʼunaiwa nachiirua. Mojusü tü waaʼinrakat süka wooʼulaain noʼunuin», nümaka namüin na nusurulaatsekana. Nuʼunaka Faraón otta na nusurulaatsekana nachiirua na israeliitakana.

Nuʼunirüin Jeʼwaa tü nupueulosekat. Eesü nutuma wanee siruma soʼukai jee chuwatüsü nutuma wanee siki iipünaa saʼwai. Nüntirüin naya sotpaʼamüin tü palaa Ishosükat jee nuutkajeʼerüin naya yala.

Mapa, neʼrüin na israeliitakana sein faraón nachiirua namaa na nusurulaatsekana. Nnojoishii jalapünaainjanain naya. Namaka na israeliitakana sümaa emetuluin nanüiki nümüin Moisés: «Püntirüin waya yaamüin süpüla woʼutunuinjanain aaʼin. ¿Jamüshii pujuʼitiraka waya Egiptojee?». Nusoutaka Moisés namüin: «Nnojo mmoluin jia, jiʼitaa jaaʼin nünain Jeʼwaa, jiʼraiwa tü naaʼinrajatkat süpüla nuʼtteʼerüin jia». Niʼitaain maʼin naaʼin Moisés nünain Jeʼwaa, ¿aashimüin?

Nümakalaka Jeʼwaa namüin na israeliitakana noʼunuinjanain yalejee. Soʼu aikat tia, niʼitaain Jeʼwaa tü sirumakat nachiiruajee. Piyuushisü napüleerua na egipciokana otta eejanale na israeliitakana warattuuisü.

«Paapaa puwaraaratse, piyalera shia sünainmüin tü palaakat», nümaka Jeʼwaa nümüin Moisés. Süchikijee tia, katsüinjaaka wanee joutai nutuma  Jeʼwaa. Sujutajaaka tü palaakat. Nalataka na israeliitakana pasanainpünaa sünain tü palaakat sümaa josoin napüleerua.

Oʼunushii na nusurulaatsekana faraón nachiirua na israeliitakana suluʼupünaa tia wopukot. Nnojoishii nuuʼulaain Jeʼwaa na egipciokana nalatüin süka anakalü akuwaʼipa, aakajüsü suuʼui neʼejena. Namaka na surulaatkana sümaa emetuluin nanüiki: «¡Outeena waya! Waleʼejaa wachikuaʼa, nia Jeʼwaa atkaakai süpüleerua nupueulose».

«Piyalera pajapü sünainmüin tü palaakat», nümaka Jeʼwaa nümüin Moisés. Naaʼinrapa tia, sujutaaka tü palaakat nooʼomüin na surulaatkana, wüinsitshi faraón otta na nusurulaatsekana. Outushii naya napüshuaʼa.

Wanee saʼata tü palaakat, naʼwaajüin Maleiwa na israeliitakana sümaa neeʼirajüin jayeechikat tüü: «Jiiʼiraja nümüin Jeʼwaa süka niain Miyoʼushin saaʼu kasakat süpüshuaʼa. Wüinsitshi nutuma chi amakai jee chi naajuchikai». Eeʼirajüshii naya napüshuaʼa otta ayonnajüsü maʼin tü jieyuukalüirua sümaa natalejüin pandereta. Talatüshii maʼin napüshuaʼa süka nnojoliinnapain achepchieein naya.