Oñemombeʼu rire Faraónpe umi israelita osẽma hague Egíptogui, haʼe ombyasy jey opoi hague chuguikuéra. Upévare heʼi isoldadokuérape: “Peprepara ñandéve umi kárro de gérra ha jaha hapykuerikuéra. Ndajahejái vaʼerã voi kuri oho hikuái”. Upéi Faraón ha isoldadokuéra oñepyrũ opersegi umi israelítape.

Jehová ogia umi israelítape de diakue peteĩ arai rupive ha pyharekue katu peteĩ tatarendy rupive. Jehová ogia chupekuéra pe mar Rojo peve ha upéi heʼi chupekuéra opyta hag̃ua hikuái pe mar oríllape.

Umi israelita ohechávo faraón ha ijehérsito ohupytypotaitemaha chupekuéra, tuichaiterei oñemondýi hikuái. Haʼekuéra ndaikatúi oho moõve, henondepekuéra oreko pe mar ha hapykuépe katu og̃uahẽma oúvo Faraón ha isoldadokuéra. Upévare oñepyrũ heʼi hikuái Moiséspe: “¡Ñamanombáta ningo koʼápe! ¿Maʼerãiko oreguenohẽ raʼe Egíptogui?”. Péro Moisés heʼi chupekuéra: “Ani pekyhyje. Pehaʼarõnte ha pehecháta mbaʼéichapa Jehová ñandesalva”. ¡Ajépa ojeroviaite Jehováre!

Upéi Jehová heʼi umi israelítape ojeprepara hag̃ua hikuái okontinua hag̃ua la iviáhe. Upe pyharépe, Jehová omoĩ peteĩ arai odividi hag̃ua umi israelita oĩha ha umi egipcio oĩha. Umi egipcio oĩha ládo iñypytũmbaite, péro umi israelita oĩha ládo hesakãmbaite.

 Jehová heʼi Moiséspe oipyso hag̃ua ipo pe mar gotyo. Moisés ojapóvo upéva, oñepyrũ peteĩ yvytu oipeju hatãiterei tóda la nóche. Pe mar oñembojaʼo mbytépe ha ojeavri peteĩ tape isékova ha pe y opyta ojovái peteĩ múroicha. Umi israelita oho upe tapére ha okrusa hikuái pe mar.

Faraón ha umi soldádo oho umi israelita rapykuéri pe mar mbytérupi. Péro Jehová ojapo hesekuéra sarambi, orruedaʼopa chuguikuéra umi ikárro. Upévare umi soldádo heʼi: “Jahántema koʼágui, pórke Jehová oñorairõ hína ñane kóntrape umi israelita rehehápe”.

Umi israelita ohasapa rire, Jehová heʼi Moiséspe: “Eipyso ne vastón pe mar ári”. Moisés ojapóvo upéva, pe y oho jey hendaguépe ha ojahoʼipa umi egípciope. Péicha Faraón ha isoldadokuéra omanombaite. Ni peteĩ ndojesalvái.

Umi israelita ohasa rire pe mar, omombaʼeguasu Jehovápe peteĩ purahéi rupive. Haʼekuéra heʼi: “Japurahéi Jehovápe, pórke haʼe oñembotuicha oganávo iñenemigokuérape. Haʼe oity pe mar mbytépe umi kavaju ha umi ohóvape hiʼári”. Umi israelita opurahéi aja, umi kuñanguéra ombopu ipanderéta ha ojeroky. Enterovénte ovyʼaiterei pórke ojelivráma hikuái umi egípciogui.