Tlolo he Falo sè dọ Islaelivi lẹ ko tọ́n sọn Egipti, e vẹna ẹn dọ e yigbe bo jo yé do. E degbena awhànfuntọ etọn lẹ dọmọ: ‘Mì wleawuna osọ́-kẹkẹ awhàn tọn ṣie lẹpo bo gbọ mí ni dómọna yé! Mí ma dona ko dike yé ni yì.’ Ewọ po omẹ etọn lẹ po jẹgodona Islaelivi lẹ.

Jehovah nọ yí aslọ de zan to okle podọ miyọ́n de to zánmẹ nado deanana omẹ etọn lẹ. E deanana yé wá Ohù Vẹẹ kọ̀n bo dọna yé dọ yé ni whèsla do finẹ.

Whenẹnu wẹ Islaelivi lẹ mọdọ Falo po awhànpa etọn po ko jẹgodona yé. Yé wá mọ yede to owù mẹ to ohù lọ po awhànpa Egiptinu lẹ tọn po ṣẹnṣẹn. Yé sọ dawhá hlan Mose dọmọ: ‘Mí dọ̀n pete! A na ko jo mí do Egipti.’ Ṣigba, Mose dọna yé dọmọ: ‘Mì dibu blo. Mì nọte bo pọ́n lehe Jehovah na whlẹn mí do.’ Mose dejido Jehovah go taun, kavi?

Jehovah dọna Islaelivi lẹ dọ yé ni wleawu nado jẹ aliji. To ozán enẹ mẹ, Jehovah sẹtẹnna aslọ lọ bo ze e do Egiptinu lẹ po Islaelivi lẹ po ṣẹnṣẹn. Zinvlu gọ́ngọ́n sọ ṣinyọ́n fihe Egiptinu lẹ tin te. Amọ́, hinhọ́n tin to fihe Islaelivi lẹ te.

Jehovah dọna Mose dọ ni dlẹnalọ etọn jẹgbonu do ohù lọ ji. To whenẹnu, Jehovah hẹn jẹhọn sinsinyẹn de yìn to ozán lọ blebu mẹ.  Ohù lọ sọ má do awe bọ ali gbọn ṣẹnṣẹn etọn. Islaelivi livi susu lọ lẹ zinzọnlin gbọn aigba-klo ji to adó osin tọn lẹ ṣẹnṣẹn bo dasá yì awà awetọ ji.

Awhànpa Falo tọn jẹgodona Islaelivi lẹ gbọn aigba-klo lọ ji kaka yì ohù lọ ṣẹnṣẹn. Enẹgodo, Jehovah hẹn awhànpa lọ biọ bẹwlu mẹ. Kẹkẹfọ he to osọ́-kẹkẹ yetọn glọ lẹ sọ jẹ dide ji. Awhànfuntọ lọ lẹ dawhá dọmọ: ‘Mì gbọ mí ni họ̀n sọn fi! Jehovah wẹ to avùnho na yé.’

Jehovah dọna Mose dọmọ: ‘Dlẹnalọ towe jẹgbonu do ohù lọ ji.’ Tlolo he e wàmọ, osin he mlindopọ di adó lọ lẹ gbaṣinyọ́n awhànpa Egiptinu lẹ tọn ji. Falo po omẹ etọn lẹpo po wẹ kú. Depope to yé mẹ ma gán.

To awà awetọ ohù lọ tọn ji, gbẹtọgun daho lọ pà Jehovah po hàngbe de po dọmọ: “Jihàn hlan Jehovah, na ewọ ko yin zizedaga petepete. Osọ́ po kùnkùntọ etọn po wẹ e ko sisẹ́ dlan hùmẹ.” To whenue yé to ohàn lọ ji, yọnnu lẹ to wedu bo to húnhò. Yemẹpo wẹ to ayajẹ dọ yé jẹ mẹdekannu nugbonugbo todin.