LEKSION 22
Ang Milagro sa Pula nga Dagat
Sang nabal-an sang Paraon nga nakagua na sa Egipto ang mga Israelinhon, nagbag-o ang iya pensar parte sa pagpalakat sa ila. Ginsugo niya ang iya mga soldado: ‘Ipreparar ang tanan ko nga kangga sa inaway, kag lagson naton sila! Wala naton sila dapat ginpalakat.’ Gani, ginlagas sang Paraon kag sang iya mga soldado ang mga Israelinhon.
Ginatuytuyan ni Jehova ang iya katawhan paagi sa panganod kon adlaw kag kalayo kon gab-i. Gintuytuyan niya sila pakadto sa Pula nga Dagat, kag ginsilingan nga magkampo didto.
Dayon nakita sang mga Israelinhon nga ginalagas sila sang Paraon kag sang iya mga soldado. Wala na sila sing mapalagyuhan, ara sa atubangan nila ang dagat kag ara sa likod nila ang mga soldado sang Egipto. Nagsinggit sila kay Moises: ‘Mapatay na gid kita! Tani ginpabay-an mo na lang kami sa Egipto.’ Pero si Moises nagsiling: ‘Indi kamo magkahadlok. Magtindog kamo kag tan-awa kon paano kita luwason ni Jehova.’ Nagsalig gid si Moises kay Jehova, indi bala?
Ginsilingan ni Jehova ang mga Israelinhon nga magpreparar sa paglakat. Sa sina nga gab-i, ginbutang ni Jehova ang panganod sa tunga sang mga Egiptohanon kag sang mga Israelinhon. Madulom sa mga Egiptohanon, pero masanag sa mga Israelinhon.
Ginsilingan ni Jehova si Moises nga untayon ang iya kamot sa dagat. Dayon bilog nga gab-i nga ginpahuyop ni Jehova ang mabaskog nga hangin. Gani napihak ang dagat kag may alagyan na sa tunga. Ang minilyon ka Israelinhon naglakat patabok nga nagaagi sa mamala nga alagyan sa tunga sang daw nangin mga pader nga tubig.
Ginsunod sang mga soldado sang Paraon ang mga Israelinhon. Dayon ginpasalasala ni Jehova ang mga soldado. Nagkalahukas ang mga ruweda sang ila mga kangga. Ang mga soldado nagsinggit: ‘Malagyo kita! Si Jehova ang nagapakig-away para sa ila.’
Si Jehova nagsiling kay Moises: ‘Untaya ang imo kamot sa dagat.’ Dayon natabunan sang tubig ang mga soldado sang Egipto. Napatay ang Paraon kag ang tanan niya nga soldado.
Sa tabok sang dagat, nagkanta ang madamo nga tawo para dayawon ang Dios: ‘Mag-amba kay Jehova, bangod sang iya mahimayaon nga kadalag-an. Gintagbong niya sa dagat ang kabayo kag ang nagasakay sa sini.’ Samtang nagakanta ang mga tawo, ang mga babayi nagasaot kag nagatokar sing mga tamburin. Nalipay gid ang tanan kay nahilway na sila.
“Gani, makasiling kita nga may pagsalig: ‘Si Jehova ang akon manugbulig; indi ako magkahadlok. Ano ang mahimo sang tawo sa akon?’”—Hebreo 13:6
Basi Manamian Ka Man
HILIMUON SA PANGPAMILYA NGA PAGSIMBA
Ginluwas ni Jehova ang mga Israelinhon
Magpili sing hilimuon para sa inyo pamilya base sa komiks sang mga istorya sa Biblia.
ANG BIBLIA—ANO ANG MENSAHE SINI?
Ginluwas sang Dios ang mga Anak ni Israel
Paano gingamit sang Dios si Moises sa pagluwas sa mga Israelinhon sa pagkaulipon sa Egipto? Ngaa ginasaulog ang Paskua?
