Farao tja zuva kutja Ovaisrael va piti moEngipte, eye wa rundurura omeripura we ohunga nokuyandjera Ovaisrael kutja ve yende. Eye wa raera ovarwe ve na tja: ‘Rongeriseye omatemba wandje wovita tu ve rambere! Eṱe kaatu sokuveyandjera kutja ve yende.’ Farao novarwe ve va uta okurambera Ovaisrael.

Jehova aa hongorere po otjiwaṋa tje, mokuungurisa otjikamba omutenya nomuriro mouṱuku. We ve hongorera nga pOmurongawotuu, ne ve raere kutja ve tone ozondanda mbo.

Ovaisreal va muna Farao notjimbumba tje tjovita tji matji ve rambere. Owo vari pokati komuronga novarwe vaEngipte. Owo va urakana ku Moses nave tja: ‘Matu ṱu! Andakuzu wa ṱokutwesa moEngipte uriri.’ Posiya Moses wa tja: ‘Amu tira. Undjeye mu tarere Jehova tji metu yama.’ Moses wari nongamburiro mu Jehova nu, katjiperi?

Jehova wa raera Ovaisrael okuhaṋa ozondanda. Mouṱuku mbo, Jehova wa isapo otjikamba na katwa pokati kOvaengipte nOvaisrael. Munda wOvaengipte kwari onḓorera. Posiya kOvaisrael kwari ondjerera.

Jehova wa raera Moses okuroporora eke re kombanda yomuronga. Nu Jehova wa eta otjivepo otjinamasa tji tja vinga  ouṱuku auhe. Omuronga wa haṋika motupa tuvari, nu pa ri oruveze romakapitiro pokati. Ovaisrael omangete omengi va konda omuronga poṋa pu pa kaha okuyenda munda warwe pokati komeva nga yeruruka tjimuna ozomira.

Ovarwe vaFarao va kongorera Ovaisrael momuronga pehi nda kaha. Mokamanga Jehova wa kurungisa ovarwe mba. Omarama womatemba wovita ya uta okuhomoka. Ovarwe va uta okuura nave tja: ‘Ngatu zapo poṋa mba! Jehova me ve rwire.’

Jehova wa tja ku Moses: ‘Roporora eke roye kombanda yomuronga.’ Tjimanga omuronga wa wira kombanda yotjimbumba tjaEngipte tjovita. Farao novarwe ve avehe va kokera mbo. Kapena nandarire umwe wawo ngwa hupa.

Munda mbwina nomuronga, otjimbumba otjinene tjovandu tja tanga Jehova neimburiro natji tja: ‘Imburireye Muhona, orondu Eye wa tongama kombandambanda. Oukambe novakavire we ve yumbu momuronga.’ Ovandu ngunda amave imbura, ovakazendu aave pundu nokunyanda ovinangoma. Auhe wari nondjoroka tjinene orondu nai mave tjiwa kutja va kuturwa katjotjiri.