Idi nangngeg ni Faraon a nakapanawen dagiti Israelita iti Egipto, nagbabawi ta pinalubosanna ida. Imbilinna kadagiti soldadona: ‘Isaganayo amin a karuahek a pakigubat ket kamatentayo ida! Ditay koma impalubos a pumanawda.’ Kinamat ni Faraon ken dagiti soldadona dagiti Israelita.

Indalan ni Jehova dagiti adipenna babaen iti ulep iti aldaw ken babaen iti apuy iti rabii. Inturongna ida iti Nalabaga a Baybay, ket imbagana nga agyanda pay laeng sadiay.

Idi kuan, nakita dagiti Israelita ni Faraon ken dagiti soldadona a kumamkamat kadakuada. Addada iti nagbaetan ti baybay ken dagiti soldado nga Egipcio. Napupokdan. Imbagada ken Moises: ‘Mataykamin! Imbatinakami koma lattan idiay Egipto.’ Ngem kinuna ni Moises: ‘Dikay agbuteng. Urayenyo ken kitaenyo ti panangisalakan ni Jehova.’ Talaga nga agtaltalek ni Moises ken Jehova!

Imbaga ni Jehova kadagiti Israelita nga ituloyda ti magna. Iti dayta a rabii, inyakar ni Jehova ti ulep ket impanna iti nagbaetan dagiti Egipcio ken dagiti Israelita. Nasipnget iti ayan dagiti Egipcio, ngem nalawag iti ayan dagiti Israelita.

 Imbaga ni Jehova nga iyunnat ni Moises ti imana iti baybay. Kalpasanna, agpatnag a pinagangin ni Jehova iti napigsa. Nabisngay ti baybay ket adda naaramid a namaga a dalan iti tengnga. Nagna ti minilion nga Israelita iti namaga a daga, iti nagbaetan dagiti pader a danum.

Sinurot dagiti soldado ni Faraon dagiti Israelita iti namaga a daga. Idi kuan, ginulo ni Jehova dagiti soldado. Naikkat ti pilid dagiti karuaheda. Impukkaw dagiti soldado: ‘Pumanawtayon! Ni Jehova ti makilablaban para kadakuada.’

Imbaga ni Jehova ken Moises: ‘Iyunnatmo ti imam iti baybay.’ Nagsubli ti danum ket nalmes dagiti soldado. Natay ni Faraon ken ti amin a soldadona. Awan ti nakalasat.

Iti ballasiw ti baybay, indaydayaw dagiti Israelita ti Dios ket inkantada: “Kantaak ni Jehova, ta nagbalin a natan-ok unay. Ti kabalio ken ti nakasakay iti dayta intapuakna iti baybay.” Bayat nga agkankantada, nagsala dagiti babbai ken nagtokarda iti pandereta (tambourine). Nakaragragsakda amin ta talaga a nawayawayaandan.