Israela ni Egutu mung kaw nna pru mat wa sai hpe Hpara-u na ai shaloi, shanhte hpe dat kau ya ai hte seng nna shi a myit galai shai wa ai. Shi a hpyen la ni hpe ndai hku matsun ai: ‘Hpyen gumra leng yawng hpe shajin da u. Shanhte hpang hkan shachyut ga. Shanhte hpe anhte n mai dat kau ai.’ Dai hpang, shi hte shi a masha ni gaw Israela ni hpe hkan shachyut ai.

Yehowa gaw shani hta sumwi hte, shana hta wan shadaw hpe lang nna, shi a amyu sha ni hpe woi awn ai. Nawng Hkyeng Hka de du hkra shi woi awn wa nna, sum ni gap nna nga na matu shi matsun ai.

Dai shaloi, Hpara-u hte shi a hpyen ma ni gaw, shanhte hpang hkan wa ai hpe Israela ni mu ma ai. Shanhte gaw Egutu hpyenla ni hte panglai a lapran hta du taw nga ai. Shanhte gaw Mawshe hpe ndai hku marawn nna tsun ai: ‘Anhte gaw si ra na sai. Egutu mung hta nang anhte hpe ngam da ra ai.’ Raitim Mawshe gaw: ‘Hkum hkrit. Yehowa anhte hpe gara hku hkye la na hpe yu yu ga’ ngu tsun ai. Mawshe gaw Yehowa hpe teng sha kam hpa wa ai.

Sum ni hpe gun kau na matu Israela ni hpe Yehowa tsun ai. Dai shana hta Yehowa gaw, Egutu ni hte Israela ni a lapran hta sumwi hpe tawn da ai. Egutu ni a maga gaw nsin rai taw nna, Israela ni a maga hta gaw, nhtoi htoi taw nga ai.

Mawshe a lata hpe panglai ntsa de ladawn dat na matu Yehowa tsun ai. Dai hpang Yehowa gaw, shana ting nbung kaba hpe dat dat ai. Panglai gaw  lahkawng brang garan mat nna, lapran hta masha hkawm sa mai ai lam byin mat ai. Wan hku law ai Israela ni gaw, hka shakum lahkawng lapran kaw nna hkun hkraw ai lamu ga hku hkawm sa wa ma ai.

Hpara-u a hpyen la ni gaw, hkun hkraw ai panglai htumpa hku nna, Israela ni hpe hkan shachyut ai. Dai shaloi Yehowa gaw, hpyen la ni hpe jamjau hkra galaw dat ai. Shanhte a gumra leng ni hten wa ai. Hpyen la ni gaw: ‘Ndai kaw na hprawng ga. Yehowa gaw shanhte a matu gasat ya nga sai’ ngu marawn ma ai.

Yehowa gaw Mawshe hpe: ‘Na a lata hpe panglai ntsa ladawn dat u’ ngu tsun ai. Dai shaloi, hka shakum ni gaw Egutu hpyen la ni hpe ka-up kau ai. Hpara-u hte shi a masha yawng si mat ai. Langai mi mung asak n lawt ai.

Panglai a kaga hkran de du mat sai masha ni gaw Karai Kasang hpe ndai hku mahkawn shakawn ai: “Yehowa hpe ngai mahkawn mangoi na nngai; Shi gaw magam shingkang dan hkung let ninglaw nga ai. Gumra hte dai hta jawn ai wa hpe nawng hta gumpye bang kau nu ai.” Masha ni mahkawn hkawn nga ai shaloi, num ni gaw shupsheng ni dum nna ka manawt ma ai. Ya gaw shanhte ni gaja wa lawt lu sai majaw, yawng gaw grai pyaw ma ai.