Faraɔɔ ñɩtaa ɛnɩɩ se Izrayɛɛlɩ piya lɩ Ejipiti ɛjaɖɛ taa lɛ, ɛlɛɣzɩ lɩmaɣza. Eheyi ɛ-sɔɔjanaa se: ‘Ɩñɔɔzɩ mo-you lɔɔɖa nɛ ɖɩtɩŋ pa-wayɩ. Pɩtaapɔzɩ se ɖiyele-wɛ nɛ pɛɖɛɛ.’ Nɛ ɛ nɛ ɛ-sɔɔjanaa paɖʋ Izrayɛɛlɩ piya wayɩ.

Yehowa kaawɛɛ nɛ eɖiyiɣ ɛ-samaɣ; wɩsɩ taa lɛ, mɩndʋ kaawɛna nɛ tihuuzuu pɔ-yɔɔ nɛ ɖoo taa lɛ, ñalɩmɩyɛ wɛɛ pɔ-cɔlɔ. Ewoni-wɛ Teŋgu Kɩsɛɛmʋʋ cɔlɔ nɛ eheyi-wɛ se pesiɣ kizinzikiŋ nɛ pasʋʋ ɩ-tɛɛ.

Pʋwayɩ lɛ, Izrayɛɛlɩ piya na Faraɔɔ nɛ ɛ-sɔɔjanaa, peɖiɣni pa-wayɩ kɔm. Lɛɛlɛɛyɔ, Teŋgu Kɩsɛɛmʋʋ nɛ Ejipiti sɔɔjanaa paɖʋ-sɩ hɛkʋ. Sikoo nɛ siheyi Moyizi se: ‘Ðɔ-tɔm tɛma! Ye ŋŋnawa, ŋyebi-ɖʋ Ejipiti.’ Ɛlɛ Moyizi heyi-sɩ se: ‘Sɔɔndʋ ɛtaakpa-mɩ. Ɩsɩŋ nɛ ɩna ɛzɩma Yehowa kaɣ yabʋ ɖa-ñʋʋ yɔ.’ Moyizi taɣaɣ Yehowa liu siŋŋ, yaa we?

Yehowa heyi Izrayɛɛlɩ piya se sɩkpɛzɩ kizinzikiŋ. Ðoo yuwa lɛ, Yehowa yele nɛ mɩndʋ wɛɛ Izrayɛɛlɩ piya nɛ Ejipiti mba pɛ-hɛkʋ taa. Cɩkpɛndʋʋ kaawɛ Ejipiti mba hɔɔlʋʋ taa, nɛ ñalɩmɩyɛ ñɛwɛɛ Izrayɛɛlɩ piya hɔɔlʋʋ taa.

 Yehowa heyi Moyizi se eposi e-nesi nɛ teŋgu yɔɔ. Nɛ Yehowa yele nɛ helim sɔsɔm nabʋyʋ ma ɖoo ana a-taa. Teŋgu tayɩ nabʋlɛ nɛ nʋmɔʋ wɛɛ hɛkʋ taa. Nʋmɔʋ ŋgʋ kɩ-taa wɩlɩ ɛzɩ tɛtʋ maɣmaɣ yɔɔ yɔ, nɛ Izrayɛɛlɩ piya miiliyɔɔwaa sakɩyɛ ɖɔ kɩ-taa nɛ sɩtɛzɩ teŋgu.

Faraɔɔ sɔɔjanaa tɩŋ sɩ-wayɩ nʋmɔʋ ŋgʋ kɩ-taa. Peeɖe Yehowa yeba nɛ po-you lɔɔɖa pɔbɔla paɣzɩ lɩʋ. Sɔɔndʋ kpa sɔɔjanaa nɛ papaɣzɩ kou nɛ pɔyɔɔdʋʋ se: ‘Ðise ɖɩpɩsɩ! Yehowa wɛɛ ɛlʋkɩ pɔ-yɔɔ.’

Yehowa heyi Moyizi se: ‘Posi ñe-nesi teŋgu yɔɔ.’ Ɛlabɩ mbʋ lɛ, lɩm kolonzi pɩsɩ nɛ sɩwadɩ Ejipiti sɔɔjanaa yɔɔ. Faraɔɔ nɛ ɛ-sɔɔjanaa pa-tɩŋa pasɩ. Pa-taa nɔɔyʋ tɩpɩzɩ nɛ ɛlɩɩ.

Izrayɛɛlɩ samaɣ tee Yehowa hendu nɛ kasamɩ-ɩ se: “Ðɩyaa [Yehowa] keɣa, ɖɩñɔkɩ-ɩ pɩŋŋ. Etuzi kpaŋnʋ nɛ ɛ-yɔɔ caɣyʋ nɛ ɛpɛɖɩ pɔɔ taa.” Samaɣ teɣaɣ hendu lɛ, halaa ñɛwɛɛ nɛ papaɣ nɛ pamakɩ loŋanzɩ. Paa weyi ɛ-taa kaawɛ leleŋ, mbʋ pʋyɔɔ yɔ lɛɛlɛɛyɔ lɛ, pɛhɛzaa.