Ntangu Farao waka nde bantu ya Izraele me bikisa Ezipte, yandi sobaka mabanza na yandi na yina me tala mutindu yandi pesaka bo nzila ya kukwenda. Yandi songaka basoda na yandi nde: ‘Beno yidika bapusu-pusu na mono yonso ya bitumba, mpi beno kwenda kulanda bo! Yo lombaka ve nde beto pesa bo nzila ya kukwenda.’ Yandi ti bantu na yandi, bo yantikaka kulanda bantu ya Izraele.

Yehowa vandaka kutwadisa bantu na yandi; yandi vandaka kusadila dituti na mwini mpi tiya na mpimpa. Yandi nataka bo na Nzadi-Mungwa ya Mbwaki, mpi yandi songaka bo na kusala camp.

Ebuna bantu ya Izraele monaka Farao ti basoda na yandi ke landa bo. Bo kangamaka na mutambu na kati ya nzadi-mungwa mpi basoda ya Ezipte. Bo didilaka Moize nde: ‘Beto ta fwa! Yo lombaka nge bikisa beto na Ezipte.’ Kansi Moize tubaka nde: ‘Beno wa boma ve. Beno vingila mpi beno mona mutindu Yehowa ta gulusa beto.’ Moize tulaka kibeni ntima na Yehowa, mpidina ve?

Yehowa songaka bantu ya Izraele na kukwenda. Na mpimpa yina, Yehowa bakaka dituti mpi tulaka yo na kati-kati ya bantu ya Ezipte mpi bantu ya Izraele. Na simu ya bantu ya Ezipte, mudidi vandaka. Kansi na simu ya bantu ya Izraele, nsemo vandaka.

Yehowa songaka Moize na kutandula diboko na yandi na zulu ya nzadi-mungwa. Ebuna Yehowa salaka nde mupepe ya ngolo  kubula na mpimpa yina ya mvimba. Nzadi-mungwa kabwanaka na bandambu zole, mpi nzila salamaka na kati-kati. Bamilio ya bantu ya Izraele tambulaka na ntoto ya kuyuma, na kati-kati ya bibaka ya masa, mpi bo kwendaka na simu yina ya nkaka.

Basoda ya Farao landaka bantu ya Izraele na ntoto ya kuyuma na kati-kati ya nzadi-mungwa. Na nima Yehowa kumisaka basoda yina kisaka-saka. Makulu ya bapusu-pusu yantikaka kukatuka. Basoda tubaka na ndinga ya ngolo nde: ‘Beto katuka awa! Yehowa ke nwana sambu na bo.’

Yehowa songaka Moize nde: ‘Tandula diboko na nge na zulu ya nzadi-mungwa.’ Na mbala mosi, bibaka ya masa bwaka na zulu ya basoda ya Ezipte. Farao ti bantu na yandi yonso fwaka. Ata muntu mosi ve gulukaka.

Na simu yina ya nkaka ya nzadi-mungwa, kimvuka ya nene ya bantu vandaka kukumisa Nzambi na nkunga yai: “Beno yimbila Yehowa, sambu nkembo na yandi me kuma mingi. Yandi me losa mpunda ti muntu yina ke tambusa yo na nzadi-mungwa.” Ntangu bantu vandaka kuyimba, bankento vandaka kukina mpi kubula bangoma ya fioti. Bantu yonso vandaka na kiese mingi sambu ntangu yai bo vandaka kibeni na kimpwanza.