GĨCUNJĨ KĨA 22
Kĩama Iria-inĩ Itune
Rĩrĩa Firauni aaiguire atĩ Aisiraeli nĩ moima Misiri, nĩ eericũkirũo nĩ ũndũ wa kũmarekereria mathiĩ. Eerire thigari ciake ũũ: ‘Haarĩriai ngari ciakwa ciothe cia mbaara nĩguo tũmarũmĩrĩre! Tũtingĩrekire mathiĩ.’ Firauni na thigari ciake makĩmarũmĩrĩra.
Jehova aahũthĩrire itu mũthenya na mwaki ũtukũ gũtongoria andũ ake. Aamatongoririe nginya Iria-inĩ Itune, na akĩmeera maambe hema ho.
Thutha ũcio nĩ moonire Firauni na thigari ciake mamarũmĩrĩire. Meekorire mahĩtĩrĩirio nĩ thigari cia Amisiri iria-inĩ itune. Maarĩrĩire Musa makĩmwĩraga ũũ: ‘Nĩ tũkũũragwo! Kaba ũngĩrekire tũikare Misiri.’ No Musa akĩmeera ũũ: ‘Tigai gwĩtigĩra. Etererai muone ũrĩa Jehova egũtũhonokia.’ Hatarĩ nganja Musa nĩ eehokete Jehova.
Jehova nĩ eerire Aisiraeli maambĩrĩrie thabarĩ. Ũtukũ ũcio, Jehova nĩ aaigire itu gatagatĩ ka Amisiri na Aisiraeli. Kwarĩ na nduma nene mwena ũrĩa Amisiri maarĩ, no mwena ũrĩa Aisiraeli maarĩ warĩ na ũtheri.
Jehova eerire Musa atambũrũkie guoko gwake iria-inĩ na agĩcoka agĩtũma rũhuho rũnene rũhurutane ũtukũ wothe. Iria nĩ rĩagayũkanire maita merĩ, na hakĩgĩa na njĩra. Aisiraeli milioni nyingĩ nĩ maaringire mũrĩmo ũcio ũngĩ wa iria maagereire gatagatĩ ga thingo igĩrĩ cia maĩ harĩa haatuĩkĩte thĩ nyũmũ.
Thigari cia Firauni nĩ ciarũmĩrĩire Aisiraeli igereire thĩ ĩyo nyũmũ. Jehova aacokire agĩtũma thigari icio itukanĩrũo. Magũrũ ma ngari cia cio cia mbaara nĩ maambĩrĩirie kuumana. Thigari cia Misiri ikĩanĩrĩra ikiuga: ‘Nĩ tũũrei tũtigane na Aisiraeli! Jehova nĩ aramarũĩrĩra!’
Jehova aacokire akĩra Musa ũũ: ‘Tambũrũkia guoko gwaku iria-inĩ.’ O rĩmwe thingo icio cia maĩ nĩ ciacokanire na ikĩhumbĩra thigari cia Amisiri. Firauni na thigari ciake nĩ maakuire na gũtirĩ o na ũmwe wahonokire.
Mwena ũrĩa ũngĩ wa iria kĩrĩndĩ kĩa Aisiraeli nĩ kĩagoocire Jehova na rwĩmbo na gĩkĩina ũũ: “Nĩngũinĩra Jehova nĩ ũndũ gũtũũgĩrio nĩwe ũtũũgĩrĩtio; Mbarathi nĩamĩikĩtie iria-inĩ hamwe na mũmĩhaici [mũmĩtwarithia].” Rĩrĩa andũ mainaga, atumia nao maathũngũthaga makĩinagia manyanga. Andũ othe maarĩ na gĩkeno mũno tondũ matiarĩ ngombo rĩngĩ.
“Nĩ getha tũkoragwo na ũmĩrĩru mũnene wa kuuga: ‘Jehova nĩwe mũndeithia; ndigwĩtigĩra. Mũndũ angĩnjĩka atĩa?’”—Ahibirania 13:6
Icunjĩ Ingĩ Hihi Ũngĩenda Gũthoma
MAŨNDŨ MA GWĨKA HĨNDĨ YA ŨTHATHAIYA WA FAMĨLĨ
Jehova nĩ Aahonokirie Aisiraeli
Cagũra tũmaũndũ twa gwĩka na famĩlĩ yaku kuuma harĩ tũtuni twa rũgano rwa Bibilia.
