Kioso Falaó kiévu kuila akua Izalaiele a xisa o ixi ia Ijitu, ua lungulula o ibanzelu iê ia kua eha kutunda. Ua tumina o masoladi mê: ‘Zenu ni makalu oso a ita, phala tua kaiele! Ki tua tokala kua eha kutunda bhabha.’ Muene ni masoladi mê, a kaiela akua Izalaiele.

Jihova ua kexile mu kuendesa o mundu uê, bhu kaxi ka philadi ia dituta mu muanha, ni bhu kaxi ka philadi ia túbhia mu usuku. Muene ua endesa katé ku Kalunga ka Kusuka, iu ua tangela kuila a kala mu ibuka-ibuka.

Mu kienhiki, akua Izalaiele a mono Falaó ua kexile mu kuiza ku dima diâ. Ene a kexile bhu kanjila kajokota, ku pholo o Kalunga ka Kusuka, ku dima o masoladi akua Ijitu. Ene a dikola kua Mozé: ‘Etu tua fuó! Sembele se tua kexile ku ixi ia Ijitu.’ Mozé uambe: ‘Ki mu kale ngó ni uôma. Emanenu phala mu mone kiebhi Jihova kia-nda tu bhulula.’ Mozé ua dielele kua Jihova, ki kidi?

Jihova uambela akua Izalaiele phala kumateka o kuenda. Mu usuku uenhó, Jihova ua katula o dituta iu ua di tula bhu kaxi ka akua Izalaiele ni akua Ijitu. Ku mbandu ia akua Ijitu kua kexile kitombe. Maji ku mbandu ia akua Izalaiele, kua kexile mukengeji.

 Jihova uambela Mozé phala kusununa o lukuaku luê mu kalunga. Anga Jihova ua bhangesa kubhusa kitembu kia dikota usuku uoso. O kalunga ka di uanuna mu mbandu jiiadi anga bhu jikula njila mu kaxi ka kalunga. O jimidi ni jimidi ja mundu ua Izalaiele a bhiti mu kaxi ka kalunga ka kukuta.

O masoladi a Falaó, a kaiela akua Izalaiele katé mu kaxi ka kalunga. Anga Jihova ua bhangesa o masoladi kukala mu kavuanza. O malola exile mu kuika o makalu mâ. O masoladi a dikola: ‘Tu lengienu! Jihova ua mua bhângela.’

Jihova anga uambela Mozé: ‘Sununa o lukuaku lué mu kalunga.’ Kalunga anga ka vutuka ni nguzu bhu kididi kiê, anga a a bobesa mu menha. Falaó ni masoladi mê moso, afu. Ki ku subhuka muthu.

Ku sambua dia mukua dia kalunga, o akua Izalaiele a ximana Nzambi ni muimbu: ‘Tuimbila Jihova, kuma muéne ua di jingisa kinené; ni kabalu ni iú ua sambela-ku ua a texe mu menha.’ Kioso o mundu ki ua kexile mu kuimba, o ahatu akexile mu kina ni kuxika jingoma. Mu kidi o mundu uoso ua sangulukile, mukonda a a bhulula ku hadi ioso.