Dimioo nuaa mi Felo tuɛi maa Isɔluɛiya mal Ichipi, mbo siŋga yiyaŋ ndɔɔ le sabu o mal nda ma kua wo. Mbo dimul puaa nduaa chɔuwa aa: ‘La chua nyɛm chɔu suaa naŋndoŋ, miŋ nyaanuŋ nda kɔɔli. Naŋ nɔ mi naŋ mal nda ma kuɛ le.’ Mi Felo a puaa nduaa kandu Isɔluɛiya nyaanɔŋndo kɔɔli.

Mi Chɛhowa ndoo soliŋ yumbu yumboo kpeku le wanaa nduaa nɛiyo chɔmndo ipala. Nduyɛ ichɔl, mi ndoo soliŋ yiŋndeŋ kpeku. Mbo kua a nda o Pee Siaŋa Mɛŋma iHɛllo, nduyɛ mbo dimul nda maa a kila dɔɔŋgɔɔ loŋ.

Okoŋ, mi Isɔluɛiya cha Felo a puaa nduaa chɔuwa hunɔɔ nda kɔɔli a kiltaŋ. Isɔluɛiya wa niko o buŋgɛi niŋ. Pioo wa nda lachi, nduyɛ Ichipiaŋnda wa nda hunɔɔ kɔɔli a kiltaŋ. Okoŋ, ma chaŋ o Muuse lo aa: ‘Diuwo nda hiŋ naa nuaa ni! Num oo nɔ maa mal naa miŋ waŋnuŋ Ichipi.’ Kɛ mi Muuse dimi aa: ‘La yɔŋ isiooŋ te. La sim mi la che mɛɛ Chɛhowa cho naa piŋi yɛ.’ Muuse ndoo nɔ tiindaŋndo o Chɛhowa niŋ, lende le?

Mi Chɛhowa dimul Isɔluɛiya le ma faŋaŋ o dɔɔŋgɔ nda wa niŋndo. Ichɔl koŋ, mi Chɛhowa faŋa yumbu yumboo Isɔluɛiya lachi, mbo miŋgi ndu nda tɛɛŋ nda Ichipiaŋnda. Nyumndaŋ ma wa kpeŋgii Ichipiaŋnda, kɛ nyɛ wawoŋndo wa kpeŋgii Isɔluɛiya.

Mi Chɛhowa dimul Muuse maa o siɛndi ba ndɔɔ o pioo choo. Mi Chɛhowa tosa mi hueiye lɔl hɔŋndo pii ichɔl koŋ. Mi mɛŋndaŋ ma  piɔuwaŋ tɛɛŋ, mi maŋ ma hel kumbuei hei, mi maŋ ma hel kumbuei pilɛi. Okoŋ ma sɔla nɛiyo le hiouwɔɔ. Mi Isɔluɛiya o miiliɔŋndaŋ niŋ kei o lɛŋnde vesɛileŋ choo, o pee koŋ tɛɛŋ haaa ma taŋ leeloo.

Mi puaa chɔuwaa Felo wa tual Isɔluɛiya kɔɔli o lɛŋnde vesɛile leŋ choo o mɛŋma maŋ tɛɛŋ. Kɛ mi Chɛhowa tosa mi sɔɔŋ yɔŋnuŋ nda tɛɛŋ laasi laasi. Mi nyɛla nyaanaŋnda suaa naŋ ndaŋ la hau, la ve lɛ lakɔ le. Mi puaa chɔuwa deŋi choo choo aa: ‘La ŋ faŋaŋ waŋnda haa kɔɔli, Chɛhowa cho chɔulabaa le nda ni.’

Mi Chɛhowa dimul vɛlɛ Muuse aa: ‘Siɛndi ba numndo o pioo choo.’ Mɛɛ o siɛndi, mi mɛŋndaŋ ma kumbu puaa chɔuwaa Ichipiaŋnda kpu. Mi Felo a puaa nduaa chɔuwa kpou wu. Opilɛ bɛɛ lo yoomu le.

Mi faŋga bɛndu taŋ koŋ pioo wo saŋgala Mɛlɛka o chondei niŋ aa: “I cho chondei soli naa Mɛlɛka Yaawɛɛ chua, kani fondole, le mɛɛ o yem a kpaaya ndɔ bɛndoo yɛ. Wanaa kua o suaa choo wa, latulu a suaa kaŋ kpou, mbo miisuu nda o pee mɛŋma ihɛllo niŋ.” Waŋnda wa chondei solioo, mi waŋ laanduaa wa yolaŋ, nduyɛ ma luaa dundulaŋ. Nda kpou wa a kɔl kɛndɛ le mɛɛ Mɛlɛka soli nda o chɛleŋ niŋ yɛ.