တၢ်မၤလိ ၂၂
တၢ်လီၤလးဖဲပီၣ်လဲၣ်ဂီၤ
ဖဲပှၤအံၣ်စရ့လးဖိတဖၣ် ဟးထီၣ်လၢကီၢ်အဲၤကူပတူးအပူၤဝံၤအလီၢ်ခံ စီၤပၤဖၤရိၤအသးဆီတလဲဝဲလီၤ. ဖၤရိၤတဲဘၣ်အပှၤသုးဖိတဖၣ်လၢ– ‘ကတဲာ်ကတီၤထီၣ်လ့ၣ်ကဟၣ်ခဲလၢာ် ဒီးပကလဲၤလူၤပှၤအံၣ်စရ့လးဖိတဖၣ်လီၤ. ပပျၢ်လီၤအဝဲသ့ၣ်န့ၣ် ကမၣ်လံ.’ စီၤပၤဖၤရိၤဒီးအပှၤသုးဖိတဖၣ် စးထီၣ်လဲၤလူၤဝဲ ပှၤအံၣ်စရ့လးဖိတဖၣ်လီၤ.
ယဟိဝၤယွၤသူဝဲတၢ်အၢၣ်ထူၣ်လၢ မုၢ်ဆါဒီးသူဝဲမ့ၣ်အူထူၣ်လၢမုၢ်နၤဒ်သိး ကဆှၢဝဲပှၤအံၣ်စရ့လးဖိတဖၣ်အဂီၢ်လီၤ. ကစၢ်ယွၤဆှၢပှၤအံၣ်စရ့လးဖိဆူ ပီၣ်လဲၣ်ဂီၤအကၢၢ်နံၤ ဒီးမၢအဝဲသ့ၣ်အိၣ်ကတီၢ်ဝဲ ဖဲန့ၣ်လီၤ.
ဝံၤဒီး ဖဲပှၤအံၣ်စရ့လးဖိတဖၣ် ကွၢ်လီၤလၢအလီၢ်ခံအခါ ထံၣ်စိဝဲစီၤပၤဖၤရိၤဒီးအပှၤသုးဖိတဖၣ် ဟဲလူၤအဝဲသ့ၣ်လီၤ. မ့မ့ၢ်လၢအဝဲသ့ၣ်မဲာ်ညါန့ၣ် အိၣ်ဒီးပီၣ်လဲၣ်ဂီၤန့ၣ်လီၤ. အဃိ အဝဲသ့ၣ်ကိးပသူထီၣ်တၢ်ဆူ စီၤမိၤၡ့အအိၣ်လၢ– ‘ပကသံခဲလၢာ်, နမ့ၢ်ပာ်တ့ၢ်ပှၤလၢ ကီၢ်အဲၤကူပတူးအပူၤန့ၣ် ကဂ့ၤဒံး.’ ဘၣ်ဆၣ် စီၤမိၤၡ့တဲဘၣ်အဝဲသ့ၣ်လၢ– ‘ပျံၤတၢ်တဂ့ၤ. ယဟိဝၤယွၤကမၤပူၤဖျဲးပှၤ, ခိးကွၢ်သၢၣ်.’ စီၤမိၤၡ့နာ်ယဟိဝၤယွၤလၢ အသးဒီဖျၢၣ်လီၤ.
ယဟိဝၤယွၤတဲဘၣ် ပှၤအံၣ်စရ့လးဖိလၢ အဝဲသ့ၣ်ကဘၣ်ဆဲးလဲၤတၢ်ဆူညါလီၤ. ဖဲနၤအဝဲန့ၣ် ယဟိဝၤယွၤ သုးဝဲတၢ်အၢၣ်ထူၣ် ဒီးပာ်လီၤဝဲလၢပှၤအံၣ်စရ့လးဖိဒီး ပှၤအဲၤကူပတူးအသုးဖိတဖၣ် အဘၢၣ်စၢၤလီၤ. လၢပှၤအဲၤကူပတူးအသုးဖိတဖၣ် အအိၣ်တကပၤန့ၣ်တၢ်ခံးဝဲလီၤ. မ့မ့ၢ်လၢ ပှၤအံၣ်စရ့လးဖိအအိၣ်တခီန့ၣ် တၢ်ကပီၤဝဲလီၤ.
ယဟိဝၤယွၤမၢစီၤမိၤၡ့ ယူာ်ထီၣ်အစုလၢ ပီၣ်လဲၣ်ဂီၤအဖီခိၣ်လီၤ. ဝံၤဒီး ယဟိဝၤယွၤ ဒုးလီၤကလံၤမုၢ်ဖးဒိၣ် ဒီတနၤညါ. ပီၣ်လဲၣ်သ့ၣ်ဖးဝဲခံခီ ဒီးကဲထီၣ်ဝဲကျဲလၢ ပီၣ်လဲၣ်သးကံၢ်ပူၤန့ၣ်လီၤ. ဝံၤဒီး ပှၤအံၣ်စရ့လးဖိ လၢအကကွဲၢ်တဖၣ် ဟးဝဲလၢဟီၣ်ခိၣ်လိၤဒီး ခီဂာ်ဝဲပီၣ်လဲၣ်ဂီၤလီၤ.
စီၤပၤဖၤရိၤအပှၤသုးဖိတဖၣ် လူၤပိာ်ဝဲပှၤအံၣ်စရ့လးဖိတဖၣ်အခံလီၤ. ဘၣ်ဆၣ် ယဟိဝၤယွၤ ဒုးအိၣ်ထီၣ်ဝဲ တၢ်ကီတၢ်ခဲလၢ ပှၤသုးဖိတဖၣ်အံၤအကျါလီၤ. အဝဲသ့ၣ်အလ့ၣ်ကဟၣ်အပၣ်တဖၣ် ဖျိးထီၣ်ကွံာ်လၢ အလ့ၣ်ကဟၣ်အလိၤလီၤ. ပှၤသုးဖိကိးပသူထီၣ်လၢ– ‘ပကဘၣ်ဃ့ၢ်ထီၣ်ကွံာ်လၢ ပီၣ်လဲၣ်ပူၤခဲအံၤလီၤ. ယဟိဝၤယွၤဒုးတၢ်လၢ အပှၤဂီၢ်မုၢ်တဖၣ်အဂီၢ်လီၤ.’
ယဟိဝၤယွၤမၢကဒီး စီၤမိၤၡ့လၢ– ‘ယူာ်ထီၣ်နစုလၢ ပီၣ်လဲၣ်အဖီခိၣ်တက့ၢ်.’ တဘျီဃီန့ၣ် ပီၣ်လဲၣ်ဂီၤအထံဟဲက့ၤလီၤကဒါက့ၤဒီး လုၢ်ဘၢကွံာ်ဝဲ ပှၤအဲၤကူပတူးအသုးဖိတဖၣ်လီၤ. စီၤပၤဖၤရိၤဒီး အပှၤသုးဖိတဖၣ်န့ၣ် သံဝဲခဲလၢာ်လီၤ.
လၢပီၣ်လဲၣ်ဂီၤဝၢ်ဘးခီန့ၣ် ပှၤဂီၢ်မုၢ်တဖၣ် သးဝံၣ်စံးထီၣ်ပတြၢၤကစၢ်ယွၤလီၤ. အဝဲသ့ၣ်သးဝံၣ်ထီၣ်ဝဲလၢ– “သးဝံၣ်ထီၣ်ယွၤတက့ၢ်. မ့ၢ်အကဟုဒိၣ်အကညီၢ်ဒိၣ်အဂ့ၢ်, ကသ့ၣ်ဒီးပှၤဒိးကသ့ၣ်န့ၣ် တ့ၢ်လီၤကွံာ်လၢပီၣ်လဲၣ်ပူၤလီၤ.” ဖဲပှၤဂီၢ်မုၢ်တဖၣ်အံၤ သးဝံၣ်တၢ်အဆၢကတီၢ်န့ၣ် ပှၤပိာ်မုၣ်တဖၣ်ပှီၢ်ထီၣ်ဒၢဒီး ဂဲၤကလံၣ်ဝဲလီၤ. ပှၤဂီၢ်မုၢ်တဖၣ်အံၤပူၤဖျဲးဝဲအဃိ အဝဲသ့ၣ်သူၣ်ခုသးခုဝဲဒိၣ်မးလီၤ.
“မၤသးဒ်န့ၣ်ဒီး, ပကစံးလၢ ပသးခူတလ့ၢ်, ယွၤမ့ၢ် ပှၤမၤစၢၤယၤ, ဒီးဖဲဒၣ် ပှၤကညီ ကမၤဘၣ်ယၤန့ၣ်, ယတပျံၤဘၣ်.”—ဧ့ၤဘြံၤ ၁၃:၆