Faro hanaautwile feela kuli Maisilaele kikale bazwa mwa Egepita, acinca muhupulo wahae. Kihaa laela masole bahae kuli: ‘Hamulukise likoloi zaka kaufelaa, mi luba matise! Nelusa swaneli kubatuhelela kuli baye.’ Yena ni baana bahae bakala kumatisa Maisilaele.

Jehova naaetelela batu bahae, ka kuitusisa lilu ka nako ya musihali ni ka mulilo ka nako ya busihu. Abaisa kwa Liwate Lelifubelu, mi abataluseza kuli batome mafulo.

Cwale Maisilaele babona Faro inze ataha ni mpi yahae. Nebaziyelehile hahulu bakeñisa kuli kwapata nekuinzi liwate mi kwamulaho nekutaha mpi ya Maegepita. Bahuweleza ku Mushe bali: ‘Lukashwa! Kambe neusika luzwisa mwa Egepita.’ Kono Mushe ali: ‘Musike mwasaba. Mulibelele mi mukabona mwaka lupiliseza Jehova.’ Kaniti luli, Mushe naasepile Jehova!

Jehova abulelela Maisilaele kuli balonge lika zabona kuli bafunduke. Busihu bo, Jehova ashimbulula lilu, mi alibeya mwahalaa Maegepita ni Maisilaele. Kwa lineku la Maegepita, nekunani lififi. Kono kwa lineku la Maisilaele kona nekunani liseli.

 Jehova abulelela Mushe kuotololela lizoho lahae fahalimwaa liwate. Cwale Jehova atahisa kuli kube ni moya omaata busihu kaufela. Mi liwate lakauhana, ni kusiya nzila fahali. Maisilaele babañata bazamaya fa mubu oomile mwahalaa mamota a mezi kuya mwa buse bwa liwate.

Mpi ya Faro yalatelela Maisilaele mwa liwate lene liomisizwe. Hasamulaho, Jehova afilikanya mpi ya Faro. Mawili akala kuwa kwa likoloi zabona. Masole bahuwa kuli: ‘Haluzweñi mo! Jehova wabalwanela.’

Jehova kihaa li ku Mushe: ‘Otololela lizoho lahao fahalimwaa liwate.’ Honafo feela, mamota a mezi akwahela mpi ya Maegepita. Faro ni batu bahae kaufela bashwa. Hakuna ni yomukana ku bona yanaapilile.

Mwabuse bwa liwate, batu babañata nebasweli kulumbeka Mulimu ka pina yeli: “Muopelele Jehova, kakuli ki yapahami hahulu. Ukashelize pizi ni mupahami wayona mwa liwate.” Batu hane banze baopela, basali bona nebabina ni kuliza tulupanyana. Batu kaufela nebatabile kakuli nebalukuluzwi mwa butanga.