A Farawõ sẽn wʋm tɩ Israyɛll nebã yii Ezɩptã, a toeema yam. A yeela a sodaasã yaa: ‘Rɩk-y saar-dãmbã tɩ d rig-b n tɩ yõke. D ra pa tog n bas-b tɩ b loog ye.’ A Farawõ ne a sodaasã sɩd pʋgla Israyɛll nebã.

A Zeova ra kɩtame tɩ sawadg yãagd a nebã wĩntoogo, la yʋng sã n ta, lebgda bugum. A Zeova yãag-b lame n ta mog-miuugã noore, n yeel-b tɩ b yals be n vʋʋse.

Israyɛll nebã wa n nee a Farawõ ne a sodaasã sẽn wate, tɩ mog-miuugã me be b taoore, tɩ b pa mi b sẽn kẽedẽ ye. B kelmame n yeel a Moyiiz yaa: ‘B na n kʋʋ tõndo. Fo sã n da bas tõnd Ezɩpt n são.’ La a Moyiiz yeel-b lame yaa: ‘Ra yɛɛs-y ye. Yãmb wee n yals n ges a Zeova sẽn na n maan n fãag tõndo.’ A Moyiiz ra kɩsa a Zeova sɩda, bɩ bõe?

A Zeova yeela Israyɛll nebã tɩ b yiki. Yʋn-kãnga, a Zeova kɩtame tɩ sawadgã leb poore, n tɩ be Israyɛll ne Ezɩpt nebã sʋka. Ezɩpt nebã nengẽ, ra yaa lika. La Israyɛll nebã ra tara vẽenem.

A Zeova yeela a Moyiiz t’a tẽeg a nugã n tees mogrã. A tẽega a nugã, la a Zeova kɩtame tɩ sobg fug yʋngã tõre. Mogrã welga  zĩis a yiibu, tɩ sor be tẽn-sʋkã. Israyɛll neb ka tɛkã ra kẽnda tẽn-koɛɛng zug n pasgd mogrã, tɩ koomã yas goabg la rɩtg wa lalse.

A Farawõ ne a sodaasã me pʋgla Israyɛll nebã n na n pasg mogrã. La a Zeova kɩtame tɩ b saar-dãmbã kars yãgse, tɩ b pa tõe n le kẽn ye. Sodaasã kelmame n yeele: ‘D zoe n yi, t’a Zeova zabdame n sõngd Israyɛll nebã.’

A Zeova yeela a Moyiiz yaa: ‘Tẽeg f nugã n tees mogrã.’ Koomã sẽn da yas wa lalsã lebg n siga Ezɩpt sodaasã zugu. A Farawõ ne a nebã fãa kiime. Baa a ye pa põs ye.

Israyɛll neb ka tɛkã paam n yiime. B yɩɩlame n pẽg Wẽnnaam n yeele: ‘Mam na n yɩɩlame n waoog a Zeova. Bala, bãmb naamã yaa kãsenga. Bãmb luba wiid ne b wed-rʋʋdb ko-kãsengã pʋgẽ.’ Nebã sẽn wa n yɩɩndẽ wã, pagbã ra saoodame la b wẽed sɩlsagse. Nebã fãa sũur da noomame, b sẽn sɩd paam b mensã.