Omo Falao ua vuile ngecize vaIsaleli va na tundu mu Ingito, ua liveyele ku vecela. Ngeci ua lekele masualale veni, ngueni: ‘Viukisenu matemba a ndzita ose, linga tu va kave! Ka citava tu vecele vaye.’ Kaha neni na civunga ca masualale va putukile ku tuntila vaIsaleli.

Yehova ua kele na ku tuamenena vantu veni na liselua ku mutana, kaha ku vutsiki na tuhia. Ua va tuamenene ku Cisali ca ku Tila na ku va leka va tungeko cilombo.

VaIsaleli ka va kele na kua ku tinina, mu va muene Falao ali na ku va kava na masualale veni, muomu ku lutue kua kele cisali, kaha ku nima kua kele na ku iza civunga ca masualale va Falao. Ngeci vaIsaleli va tambekele kuli Mosesa, nguavo: ‘Lelo tu tsa! Ca cili nga ua tu ecelele tu kale vene ku Ingito.’ Vunoni Mosesa ua handekele ngueni: ‘Kati mu ivue vuoma. Manenu ngoco mu mona vati a tu ovola Yehova.’ Mosesa ua kulahelele mpundu muli Yehova, ni vati?

Yehova ua lekele vaIsaleli va tualeleleho vungendzi. Ku vutsiki vuze, Yehova ua hakele liselua ha kati ka vakua Ingito na vaIsaleli. Ku sinia lia vakua Ingito kua kele milima. Vunoni ku sinia lia vaIsaleli kua kele ceke.

Yehova ua lekele Mosesa olole livoko lieni ha cisali. Kaha Yehova ua hitisileho luhundzi lua ndzili ya kama vutsiki vuose. Kaha cisali ca  litepele, na ku sokolola njila ha kati. Ku sinia limo kua kele civumbe ca mema, ku sinia likuavo kua kele civumbe cikuavo ca mema, kaha makulukazi na makukazi a vaIsaleli va zavukile cisali mu livu lia ku uma.

Masualale va Falao va kavele civunga ca vaIsaleli mu cisali. Vunoni Yehova ua tanganesele masualale. Vinkuankua ni nguetu malota a matemba avo a putukile ku somozoka. Kaha masualale va tambekele nguavo: ‘Tu tinenu muno! Yehova ali na ku luila vantu veni.’

Yehova ua lekele Mosesa, ngueni: ‘Olola livoko liove ha cisali.’ Haze vene, vivumbe via mema via kele ku mikulo via liuanene na ku fuika vakua Ingito. Falao na civunga ca masualale veni vose va tsile. Na umo uahi ua lisupileho.

Kaha mu sinia lia cisali vaIsaleli va sangalele Njambi na miaso nguavo: “Imbilenu Yehova, muomu na hiana vumpahu; Kavalu na mukua ku mu endesa na mbila mu cisali.” Omo va kele na ku imba, vampuevo va kinine na ku sika tungoma. Mbunga yose va viukilile cikuma muomu va patukile mpundu.