Kema faraón kimatki israeleuanij kistejtoyaj, moyolpatlak uan moiljuik kenke kinkauilik ma yakaj. Uan kinnauatik isoldados: “Xijkualchijchiuakaj nopa carros tlen ika titlateuiaj, uan ma tikintepotstokakaj. Amo tikinkauilijtoskiaj ma yakaj”. Uajka, ya uan itlateuijkauaj pejkej kintepotstokaj israeleuanij.

Jehová kinyakanayaya itekipanojkauaj, tonaya kinyakanayaya ika se mixtli uan tlayoua ika se tlilelemektli. Jehová kinuikak ipan ueyi atl Rojo uan kiniljuik nopaya ma mosiajkauakaj.

Teipa, israeleuanij kiitakej faraón uan itlateuijkauaj kintokilijtiauiyayaj. Amo kimatiyayaj kenijkatsa mochololtisej, pampa ininixmelak eltoya nopa ueyi atl, uan ininika ualayayaj egiptoeuanij. Uajka pejkej kiiljuiaj Moisés: “¡Timikisej! ¿Kenke titechkixtik tlen Egipto?”. Uan Moisés kinnankilik: “Amo ximajmauikaj. Ximochiakaj uan xikitakaj kenijkatsa Jehová techmakixtis”. ¿Tikita kenijkatsa Moisés motemachiyaya ipan Jehová?

Teipa, Jehová kiniljuik israeleuanij sampa ma mokualchijchiuakaj pampa kisteuaskiaj. Ipan nopa youali, Jehová kitlalik nopa mixtli tlatlajko, kiampa kampa itstoyaj egiptoeuanij tlatlayouixtoya uan kampa israeleuanij yauiyayaj tlatlanestoya.

 Teipa, Jehová kiiljuik Moisés ma kimanexti ika ikua nopa ueyi atl. Uajka toTeotsij kichijki seyoual ma tlaajaka chikauak. Nopa atl motlajkoxelok uan mochijki kej se ojtli. Israeleuanij panokej tlajtlajko kampa moxelojtoya nopa atl, kiampa tlaixkotonkej.

Faraón uan itlateuijkauaj kintokilijtiajkej israeleuanij uan kalajkej kampa nopa atl moxelojtoya. Uajka Jehová kichijki ma ikxikokopikakaj inincarrojuaj, kiampa egiptoeuanij ayokmo uelkej kintokiliaj israeleuanij. Yeka faraón itlateuijkauaj chikauak kiijtojkej: “¡Ma timochololtikaj! Jehová techteuia uan kinmanauia”.

Jehová kiiljuik Moisés: “Xijmanexti ika mokua nopa ueyi atl”. Uan nimantsi nopa atl tlen moxelojtoya, uetski ininpani egiptoeuanij. Faraón uan itlateuijkauaj mijkej. Amo aka momanauik.

Kema ya itstoyaj ipan seyok nali, nochi kiueyichijkej Jehová ika se uikatl: “Nijuikatis Jehová, pampa moueyichijtok. Kinisauik ipan ueyi atl kauayojmej uan katli ipan tlejkotoyaj”. Kema nochi uikayayaj, nopa siuamej mijtotiyayaj uan kitsiliniyayaj nopa panderetas. Nochi tlauel yolpakiyayaj pampa toTeotsij kinmakixtijtoya.