Mbalambala sho Farao u uvu kutya Aaisraeli oya za mo muEgipiti, okwa lundulula omadhiladhilo ge, ge na ko nasha noku ye etha ya ye. Okwa lombwele aakwiita ye a ti: ‘Longekidheni omatembakwiita gandje agehe tu ya landuleni. Katwa li tu na oku ye etha ya ye.’ Farao naakwiita ye oya tidha Aaisraeli.

Jehova okwa li a wilike oshigwana she, ta longitha oshikogo ethimbo lyomutenya, nuusiku okwa longitha omulilo. Okwe ye enditha sigo okEfuta Etiligane, e te ya lombwele ya yunge ontanda.

Aaisraeli oya li ya mono Farao naakwiita ye, ye ya landula. Oya li ya kondekelwa pokati kefuta netangakwiita lyaEgipiti. Aaisraeli oya lilile Moses taya ti: ‘Otatu si nena. Owa li wu na oku tu etha tu kale muEgipiti.’ Moses okwe ya lombwele a ti: ‘Inamu tila. Ikoleleni ne mu tale nkene Jehova te tu hupitha.’ Moses okwa li i inekela lela muJehova.

Jehova okwa lombwele Aaisraeli ya hanagule po ontanda yawo. Ongulohi ndjoka, Jehova okwa lundululile oshikogo shomuzile pokati kAaegipiti nAaisraeli. Kombinga yAaegipiti okwa li omilema, ihe kombinga yAaisraeli okwa li uuyelele.

Jehova okwa lombwele Moses a yeluthile okwooko kwe kefuta.  Opo ihe Jehova okwa pepitha ombepo ondhigu uusiku awuhe. Efuta olya topoka pokati nopwa ningi ondjila. Aaisraeli omamiliyona oya yi handiyaka yefuta taye ende puukukutu, pokati komakuma gomeya.

Manga Aaisraeli taye ende mefuta puukukutu, etangakwiita lyaFarao olye ya landulile mo. Ihe Jehova okwe li vundakanitha. Omagulu gomatemba gawo oga tameke taga gu ko. Aakwiita oyi igidha taya ti: ‘Tu yeni ontuku! Jehova ota kondjele Aaisraeli.’

Jehova okwa lombwele Moses a ti: ‘Yeluthila okwooko kwoye kefuta.’ Omakuma gomeya oga gwile etangakwiita lyAaegipti. Farao naakwiita ye ayehe oya sile mefuta, kapu na nando ogumwe a hupu po.

Kombinga onkwawo yefuta, okwa li ongundu onene yaantu taya tanga Kalunga neimbilo tali ti: “Otandi imbile Omuwa, oshoka okwa mono esindano enene; uukambe naakayili yawo okwe ya undulile mefuta.” Sho aantu tayi imbi, aakiintu oya li taya tembula taya hiki oontunda. Kehe gumwe okwa li a nyanyukwa noya li ye wete ya manguluka shili.