Féro éí Ízrel dineʼé Ííjip yitsʼą́ąjįʼ dadiináago tʼóó yaa hodiistsʼą́ʼígo, doo bééʼdeeshnih da ńtʼééʼ lá niizı̨́ı̨́ʼ. Féro bisiláo ííłní: ‘Tsinaabąąs bijáád naakiígíí hashtʼedaahłééh, áádóó tįʼ bikééʼ diiʼnééł! Tʼáá íídą́ą́ʼ doo bééʼdoolnih da ńtʼééʼ.’ Féro éí bisiláo yił Ízrel dineʼé bikééʼ bił dashdiiná.

Jı̨́įgo éí kʼos áádóó tłʼéeʼgo éí kǫʼ choyoołʼı̨́įgo Jiihóvah éí bidineʼé yooʼish. Tónteel Łichíiʼii bichʼįʼ hooʼish, áádóó ákweʼé nidoohnééł hałní.

Ńtʼééʼ Ízrel dineʼé éí Féro dóó bisiláo hakééʼ yinéełgo dah jiiłtsą́. Tónteel Łichíiʼii dóó Ííjip bisiláo ałtsʼą́ą́dę́ę́ʼ dah yinéełgo tsístłʼajiskai. Nídaasdzíidgo Mózes ádeiłní: ‘Kʼad éí tʼáá áníiltso tʼóó dah díníiʼnééł! Ííjipdi bíniʼdii kééhoniitʼı̨́į doo ńtʼééʼ.’ Ndi Mózes ání: ‘Tʼáadoo nídaałdzidí. Áłtsé, Jiihóvah yisdánihidooniłgi deidoołtsééł.’ Mózes éí tʼáá íiyisíí Jiihóvah yaa dzólíí ńtʼééʼ, tʼáá aaníí yaʼ?

Jiihóvah éí Ízrel dineʼé dah dohnééh yiłní. Áádóó tʼáá éí bitłʼééʼ, kʼos yę́ę Ízrel dineʼé dóó Ííjip dineʼé bitaʼ góneʼ niiníʼą́. Ííjip dineʼé bichʼįʼjįʼgo éí chahałheeł, ndi Ízrel dineʼé bichʼįʼjįʼgo éí hoolʼin.

Jiihóvah éí Mózes tónteel bikáaʼjigo dah didiilnííh yiłní. Áádóó  Jiihóvah éí tłʼééʼ bíighah ayóó átʼéego níyolgo áyiilaa. Tónteel ałtsʼáyiiłkʼol, áádóó ałnííʼ góneʼ chʼéʼétiin áyiilaa. Ízrel dineʼé tsʼídá tʼóó ahayóí ákóneʼ ałtsʼą́ą́hjí tó nihidiiʼáago hóółtseiigo tséʼnaa chʼízhníná.

Féro bisiláo éí Ízrel dineʼé tónteel biyiʼ góneʼ hakééʼ dah diiná. Áádóó Jiihóvah éí siláo yę́ę yichʼįʼ hodiisnáaʼgo, tsinaabąąs dabijáád yę́ę bąąh dahídíídéehgo áyiilaa. Siláo yę́ę dadilwoshgo ádaaní: ‘Tįʼ nátʼą́ą́ʼ! Díí yeeʼ Jiihóvah éí Ízrel dineʼé yíká análwoʼ lá.’

Jiihóvah, Mózes ííłní: ‘Tónteel bikáaʼjigo dah didíílnih.’ Tʼáá ákǫ́ǫ́, Ííjip bisiláo yę́ę tó ałtso ałchʼįʼ kónádzaago bikʼi diilkǫʼ. Féro dóó bisiláo tʼáá átʼé ałtso daneezná. Tʼáadoo łaʼ yisdááyáa da.

Tséʼnaajįʼgo éí diné tʼóó ahayóí God yaa dahaniih. Kódaaníigo dahataał: ‘Jiihóvah bichʼįʼ dahotaał, háálá bí ayóó átʼéego akʼeh deesdlı̨́ı̨́ʼ. Łı̨́ı̨́ʼ áádóó bikʼi dah nidzizdáii tónteel yiih hwiistłʼííd.’ Diné kótʼéego dahataałgo, sáanii ásaaʼ yigádígíí deighadgo daʼalzhish. Diné tʼáá altso bił dahózhǫ́, háálá yisdábiʼdootʼéézh.