Pakala vala katutu, etyi Farao eiva okuti ova Isilayeli vatunda mo Egitu, elivele. Apopila omafualali ae okuti: ‘Kapolei omatuku-tuku ange ovita, tuvelandulei! Ñgeno ankho katuveyeke vaye.’ Farao nomafualali ae avalandula ova Isilayeli.

Jeova ankho ukahi nokuhongolela ovanthu vae, komutenya uvehongolela nekaka iya kounthiki uvehongolela notupia. Wevetuala Kelunga Enkhuhu evepopila opo vakevele.

Etyi ova Isilayeli vatala konyima, avamono Farao nomafualali ae vekahi nokuya. Ankho vati nthele imwe kuna elunga iya onthele onkhuavo kuna omafualali ova Egitu. Ova Isilayeli aveliyavela! Avapopila Moisesi okuti: ‘Hono matunkhi! Ñgeno kuetupolele ko Egitu.’ Mahi Moisesi evepopila okuti: ‘Muhatilei owoma. Kevelelei opo mutale oñgeni Jeova metuyovola.’ Okuti Moisesi tyili-tyili ankho uyumba onthumbi mu Jeova?

Jeova atolela ova Isilayeli opo vakatuke opo veya. Iya Jeova apolo ekaka lina elipake pokati ko va Isilayeli no va Egitu. Iya ova Egitu avakala menthiki. Mahi ova Isilayeli, avakala notyimimi.

 Jeova atolela Moisesi opo avete kombanda yelunga. Konyima Jeova aetako omphepo onene otyinthiki atyiho. Elunga alitepuka pokati iya apakala ondyila. Ova Isilayeli ovanyingi avetyivili okuyauka elunga alo koluhimba.

Omafualali a Farao alandula ova Isilayeli. Konyima Jeova aetela ovitateka omafualali oo. Omalola omatuku-tuku aahimbika okutundako. Omafualali aeliyavela okuti: ‘Tukondokei! Jeova ukahi nokuveluila-ko.’

Jeova apopila Moisesi okuti: ‘Veta vali kombanda yelunga.’ Etyi aveta-ko omaande ahonyo aipaa omafualali aeho ova Egitu. Farao novalume aveho avankhi. Petupu nawike wahupile.

Etyi vayauka elunga, ovanthu aveho avahimbika okupandula Huku notyiimbo: “Tuimbilei Jeova mokonda una epondolo enene. Waipaa ononkhambe na vana vavelama-ko.” Putyina vaimba, ovakai otyo vanyana nokuhika onoñgoma. Aveho avahambukwa, tyili-tyili ovanthu pahe vayovoka.