Faraonqa israelitas ripusqankuta yachaytawan, pesachikorqa ripojta saqesqanmanta. Chayrayku soldadosninman nerqa: “Tukuynin maqanakuna carretasta wakichiychej. Qhepankuta rinachej. Imapajtaj saqerqanchej ripunankutari”, nispa. Chayrayku israelitasta taripaj kachaykukorqanku.

Jehová Diosqa israelitasta diapi phuyuwan pusarqa, tutantaj nina kʼanchaywan. Payqa israelitasta Puka qochaman pusarqa, chaypi jarakunankutataj nerqa.

Israelitasqa faraonwan soldadosninwan qhatiykushasqankuta rikuspa ni mayman ayqeyta aterqankuchu. Chayrayku qhaparispa Moisesman nerqanku: “Kaypi wañusunchej. ¿Chaypajchu Egiptomanta orqhomuwarqayku?”, nispa. Moisestajrí nerqa: “Ama mancharikuychejchu, rikunkichejtaj imatachus Jehová Dios ruwananta salvasunaykichejpaj”, nispa. Moisesqa Jehová Diospipuni atienekorqa.

Chantá Jehová Diosqa israelitasta ñaupajman rinallankutapuni nerqa. Israelitasta pusasharqa chay phuyutataj qhepankuman kutirichimorqa. Chay phuyutaj egipciosta laqhayaykorqa, israelitastatajrí tutan kʼancharqa.

 Chantá Jehová Diosqa Moisesman jatun qochanejman makinta oqharinanta nerqa. Jehová Diostaj tukuy chay tuta manchayta wayrachimorqa. Jinamanta chay jatun qochaqa iskayman tʼaqarparikorqa, chay cheqataj chʼaki ñanman tukorqa. Chaynejtataj may chhika israelitas pasarqanku.

Egiptomanta soldadostaj israelistaspa qhepanta yaykullarqankutaj. Jehová Diostaj paykunata pantacherqa, carretasninkoj ruedasnintapis urmaracherqa. Chayrayku egipciosqa qhaparerqanku: “Ayqekunachej. Jehová Dios paykunarayku maqanakushan”, nispa.

Jehová Diosqa Moisesman nerqa: “Makiykita jaywariy jatun qochanejman”, nispa. Chayta ruwasqantawan, ujllata yakoqa Egiptomanta soldadosta pʼampaykorqa. Faraonwan tukuynin soldadosninwan chaypi wañorqanku.

Jatun qocha chimpapitaj tukuyninku Jehová Diosman takerqanku: “Jehová Diosman takisaj, payqa manchay jatun atiyninwan atipan. Payqa caballospi rejkunata, caballosnintinta yakuwan pʼampaykun”, nispa. Takishajtinkutaj warmisqa panderetasta tocarispa tusorqanku. Tukuyninku kusisqas kasharqanku kacharichisqa kasqankumanta.