Are chi ri faraón xuto che ri israelitas xel bʼi pa Egipto, utz ta xrilo che xeʼutzoqopij bʼik. Xubʼij chke ri soldados: «Chisukʼumaj konojel ri carros re chʼoj, rech keqariqa. Utz taj che xqaya bʼi bʼe chke». Tekʼuriʼ, areʼ xuqujeʼ rachijabʼ xebʼeʼ che kichapik ri israelitas.

Are Jehová kʼamowinaq kibʼe ri utinamit, rukʼ jun sutzʼ pa qʼij, chaqʼabʼ rukʼ jun nimalaj qʼaqʼ. Xeʼuqʼaxej bʼi pa ri mar Rojo xuqujeʼ xubʼij chke che kekanaj kan chilaʼ.

Tekʼuriʼ, ri israelitas xkil ri faraón xuqujeʼ ri uʼejército e petinaq chkij. Ri israelitas kʼo ta kebʼe wi, chkiwach kʼo ri mar chkij ri ejército egipcio. Xkimaj uraqik kichiʼ xkibʼij che Moisés: «¡Kojkamik! ¿Jas rumal che xojawesaj lo pa Egipto?». Are kʼu Moisés xubʼij: «Kixibʼij ta iwibʼ. Chiweyeʼj xuqujeʼ chiwilaʼ ri kubʼan Jehová che qakolik». ¿La kawilo che Moisés sibʼalaj xukubʼsaj ukʼuʼx chrij ri Jehová?

Qʼaxinaq chi jubʼiqʼ tiempo, Jehová xubʼij chke ri israelitas che kewalijik. Pa ri chaqʼabʼ riʼ, Jehová xubʼano che xwalij ri sutzʼ xuqujeʼ xuya ri sutzʼ chkixoʼl kukʼ ri egipcios. Jachiʼ e kʼo wi egipcios kʼo qʼequʼm, are kʼu ri e kʼo wi ri israelitas kʼo saqil.

Tekʼuriʼ, Jehová xubʼij che Moisés che kuya ri uqʼabʼ pa uwiʼ ri mar. Tekʼuriʼ xubʼano che xpe jun nimalaj kaqiqʼ pa ronojel ri chaqʼabʼ. Ri mar  xujaq ribʼ pa kebʼ, pa nikʼaj xubʼan jun bʼe. Ri e kʼiʼalaj israelitas xebʼin pa chaqiʼj ulew pa ri nimalaj jaʼ re ri mar.

Ri ejército re faraón xeʼuternej ri israelitas pa ri chaqiʼj ulew re ri mar. Are kʼu Jehová xubʼano che ri egipcios xesachik. Xeʼel ri ullantas ri kicarros. Tekʼuriʼ ri soldados xkiraq kichiʼ: «¡Chojel bʼi waral! Jehová tajin kchʼojin pa uwiʼ ri utinamit».

Jehová xubʼij che Moisés: «Chayaʼ ri aqʼabʼ pa uwiʼ ri mar». Xaq kʼateʼ, ri joron xetzaq lo chkij ri ejército egipcio. Ri faraón xuqujeʼ ri rachijabʼ xekamik. Kʼo ta jun xkʼasiʼ kanoq.

Che ri jun chi uchiʼ ri mar, konojel ri winaq xkiya uqʼij ri Dios rukʼ jun bʼixonem: «Kinbʼixon che ri Jehová, rumal che xunimarisaj ri uqʼij rukʼ nimalaj chʼakanik. Ri kej xuqujeʼ ri kejenaq chrij xukʼaq bʼi pa ri mar». Are chiʼ ri winaq tajin kebʼixonik, ri ixoqibʼ kexojowik xuqujeʼ kkibʼan ri panderetas. Konojel sibʼalaj kekikotik rumal che kimik qastzij che xetzoqopitajik.