Faraonmi Israel runakunata kachaykusqanmanta pesapakuspan tropankunata nirqa: “Allichakuychik caballokunatawan carretakunata hinaspa Israel runakunata haypasun, manam ripukunankutaqa saqinanchikchu”, nispa. Hinaptinmi Israel runakunata qatirqaku.

Punchawmi Jehova Diosqa llaqtanta puyuwan pusarqa, tutanñataqmi achkiwan. Hinaspam Puka lamar quchaman chayarachispan samachirqa.

Chaypi kachkaspankum faraontawan tropankunata rikururqaku. Chaymi mana maymanpas lluptikuyta atispanku qayaykachakuspa Moisesta nirqaku: “¡Wañusunñam kunanqa! ¿Imapaqmi Egiptomanta hurqumuwarqankiku?”, nispa. Moisesñataqmi nirqa: “Ama manchakuychikchu, Jehova Diosmi yanapawasun”, nispa. Moisesqa Diospim hapipakurqa.

Chaymantam Jehova Diosqa nirqa allichakunankupaq. Chay tutam ñawpaqninkupi riq puyuta qipankumanña Diosqa churarurqa, hinaptinmi tutayay karqa Egipto runakunapaq, Israel runakunapaqñataqmi achkirqa.

Chaymantam Jehova Dios Moisesta kamachirqa lamar quchaman  makinta haywarinanpaq. Hinaptinmi tukuy tuta llumpay wayrawan lamar quchata rakinarurqa. Chaymi Israel runakunaqa chay chakichisqa ñanninta chimparqaku. Yakum pirqa hina alliq lawninkupi chaynataq ichuq lawninkupipas karqa.

Faraonpa tropanñataqmi Israel runakunapa qipanta qatiykurqa, chaymi Jehova Diosqa pantanarachirqa. Carronkupa ruedankunapas lluqsirqam, hinaptinmi qayaykachakuspanku nirqaku: “¡Ayqikusunchik! Jehova Diosmi Israel runankunawanqa kachkan”, nispa.

Jehova Diosñataqmi Moisesta nirqa: “Haywariy makikita lamar quchapa hawanman”, nispa. Chayta ruwaruptinmi faraontawan tropankunata yaku taparuspan wañurachirqa.

Israel runakunaqa chimparuspankum Diosta takiwan hatuncharqaku: “Jehova Diosmanmi takisaq, hatun atiyninta qawachisqanrayku. Egipto runakunatapas caballontintam lamar quchaman wischuykurqa”, nispa. Chaynata takiptinkum warmikunañataq tususpanku tinyankuta tocarqaku. Llapankum kusisqa karqaku lluqsimusqankuwan.