Faraonqa Israel runakunata kacharisqanmanta pesapakuspan soldadokunata niran: “Carretakunata alistaychis, jinaspa jaku qhepanta, manan kacharinanchischu karan”, nispa. Jinan soldadonkunawan Israel runakunaman aypaq riranku.

Jehová Diosmi llaqtanta pusasharan, p’unchaytaqa phuyuwanmi pusaran tutatataq nina k’anchaywan. Puka qochaq ladonmanmi aparan, chaypitaq samachiran.

Chay qhepamanmi Israel runakunaqa faraonta ejercitontawan rikuranku. Manan ayqeyta atirankuchu, ñaupankupin qocha kasharan qhepankutataq soldadokuna jamusharanku. Jinan Moisesta niranku: “¡Wañusunchismi! ¿Imapaqmi Egiptomanta orqomuwarankiku?”, nispa. Moisestaq niran: “Ama manchakuychischu. Kunanmi rikunkichis Dios salvawasqanchista”, nispa. Moisesqa confiaranmi Diospi.

Chay qhepamanmi Jehová Diosqa Israel llaqtata kamachiran jatarinankupaq. Chay tutan Diosqa phuyuta Israel llaqtaq qhepanman churaran. Jinan Egipto soldadokunapaq tutayaq karan, Israel runakunapaqtaq k’anchay.

Chay qhepamanmi Jehová Diosqa Moisesta kamachiran makinta qochaman jaywarinanpaq. Jinan sinchi kallpayoq wayra qochata  iskayman t’aqaran, jinaspa juj ñanta kicharan, chaynintan millonninpi Israel runakunaqa ch’aki pampanta chimparanku.

Israel runakuna qochata chimpashaqtinkun faraonpas soldadonkunapas qatipamuranku. Jehová Diosmi ichaqa carretankuq ruedankunata p’akiran mana usqhayta purinankupaq. Chaymi soldadokunaqa niranku: “¡Ayqekusun! ¡Jehová Diosmi llaqtanrayku maqanakushan!” nispa.

Jehová Diosmi Moisesta niran: “Makiykita qochaman jaywariy”, nispa. Jinan sayashaq unuqa soldadokunaq patanman urmaykuran. Chaypin faraonpas soldadonkunapas wañupuranku. Manan jujpas salvakuranchu.

Jinan qochata chimpaq Israel runakunaqa Diosman takiranku: “Jehová Diosman takiychis, payqa ancha jatunmi. Caballotawan sillakuqtawanmi qochapi wañuchiran”, nispa. Llaqtantin takishaqtinmi, warmikunaqa tususpa panderetata tocasharanku. Llapankun kusisqa kasharanku, kunanmi ichaqa librepuniña kapuranku.