Egiptomanda israelitacuna rishcata uyashpaca faraonga ¿imashpata paicunata richun saquishcanchiyari? nijurcami. Chaimi ‘faraonga, paipa carretata caballocunapi huatashpa, paipa soldadocunatapash paihuan tandachirca’. Shinami faraonga, paipa soldadocunahuan israelitacunata catishpa rirca.

Jehová Diosca israelitacunataca ‘punllapica fuyuhuanmi pushajurca. Tutaca ninahuanmi punchayachishpa pushajurca’. Israelitacuna mar Rojo nishcaman chayajpimi Jehová Diosca carpacunata sayachishpa samaichi nirca.

Israelitacunaca faraón paipa soldadocunandi catimunajujtami ricurca. Paicunapa ñaupajpica mar Rojo nishcami carca. Chaimandami maita rinatapash na atinashpa ninanda manllarishpa israelitacunaca Moisesta cashna caparinajurca: ‘Jichushca pambapi ñucanchi huañuchunmi Ilujchimushcangui’. ‘¿Imashpata ñucanchitaca, Egiptomanda llujchimushpa cashna rurashcangui?’ nishpa. Shinapash Moisesca nircami: “Na manllanachu canguichi, shinlli shayarichi. Shina shayarishpaca, Mandaj Dios cangunata, cunan imashna quishpichijta ricuichi” nishpa. Moisés shina nishpaca ¿nachu Jehová Diospi tucui shunguhuan confiashcata ricuchirca?

Jipamanga Jehová Diosca israelitacunataca carpacunata alsaichi nircami. Chai tutaca ‘Egiptomanda tandanajushca soldadocuna catinajujpimi’ Jehová Diosca fuyuta cuyuchishpa tandanajushca israelitacunata cuidajurca. Chaimi Egipto llactamanda soldadocunapaca fuyupash, yana yana tutashna carca. Cutin israelitacunapaca, tuta cajpipash punchallami carca.

Chai jipaca Jehová Diosca Moisestaca nircami: ‘canba vara caspita alsashpa mama cucha jahuaman canba maquita chutai’ nishpa. Shina rurajpimi tucui tuta manllanaita  huairarca. Chaimi mar Rojo nishca chaupirijpi shuj ñan ricurirca. Shinami ashtaca ‘israelitacunaca, mama cucha ishcaipi shicanyashpa chaquishca chaupita yalinajurca’.

Israelitacuna shina yalinajujpimi, ‘Egipto soldadocunaca paicunapa huashata catishpa, mama cucha chaupita’ catinajurca. Chaipimi Jehová Diosca ‘paicunapa carretacunapa ruedacunata anchuchishpa, paicunataca ninandapacha muspachijurca. Chaimandami Egipto soldadocunaca, cashna ninajurca: Israelitacunapa ñaupamandaca, pacajushpa calpashunchi. Mandaj Diosmi paicunamandaca, Egipto soldadocunata fiñashpa macanajujun’ nishpa.

Jehová Diosca Moisestaca cutinmi cashna nirca: ‘Canba maquita mama cucha jahuaman chutai’ nishpa. Shina rurajpimi, Egiptomanda soldadocunapa jahuapi, ‘paicunapa carretacunapa jahuapi, paicunapa caballocunapa jahuapi yacu quilparca’. Shinami faraonga, paipa tucuilla soldadocunandi huañurca. “Paicunapuramandaca, shujllapash na puchurcachu”.

Israelitacuna chai mar yacuta yalishca jipaca tucuillacunami Taita Diosman cashna candanajurca: “Jatun manllarinacunata rurashpa ricuchishcamandami ñucaca, Mandaj Diosman candasha. Paica caballocunandi, soldadocunandimi, mama cuchapi huashajuchishca” nishpa. Israelitacuna candanajujpica, ‘tucuilla huarmicunapashmi, panderetata huactashpa danzanajurca’. Tucuillacunami Jehová Dios salvashcamanda cushijushca carca.