Кеда шунѓа о фараони кај о Израелција геле песке таро Египет, пело пишмани со мукхља лен. Ов нарединѓа пе војскаке: „Спреминен тумаре кочие хем те џа пали ленде. На ваљани сине те мукха лен те џан песке“. О фараони хем лескере мануша геле пало Израелција.

Те шај те водинел пле народо, о Јехова дивескоро користинела сине облако, а раќате јаг. Ов ингарѓа лен џи ко Црвено Море хем пхенѓа ленге те чхивен адари шаторија.

Пало адава, о Израелција дикхле сар о фараони хем лескири војска авена пали ленде. Ола сине ки стапица, тари јекх страна сине о море, а тари јавер страна сине и египетско војска. О мануша бут дарандиле хем почминѓе те викинен е Мојсејеске: „Ка мера! Ваљанѓан те мукхе амен ко Египет!“ Ама, о Мојсеј вакерѓа ленге: „Ма даран. Аџикерен хем дикхен сар о Јехова ка спасинел амен“. Е Мојсеје сине ле бари доверба ко Јехова, нели?

О Јехова вакерѓа е Израелцонге те кхеден о шаторија. Адаја рат, о Јехова адава облако чхивѓа ле машкар ленде хем о Египќајна. Тегани тари страна е Египќаненгири сине темница, а тари страна е Израелцонгири сине светло.

О Јехова вакерѓа е Мојсејеске те пружинел по вас упро море. Тегани о Јехова керѓа бари балвал те пхудел цело рат. И балвал  делинѓа о море ко дуј хем ки средина пхравдило друмо. Аѓаар, са о Израелција накхле о море ко шуко, а таро солдуј стране сине ѕидија таро пани.

И војска е фараонескири гели пало Израелција таро исто друмо машкар о море. Тегани о Јехова керѓа збрка машкар о војникија. О тркалакија таро ленгере кочие почминѓе те икљон. О војникија викинена сине: „Те наша акатар! О Јехова боринела пе баши ленде“.

О Јехова вакерѓа е Мојсејеске: „Пружин тло вас упро море“. Таро јекх пути о море пханлило упри цело египетско војска. Тегани о фараони хем лескири војска муле. Нијекх лендар на ачхило џивдо.

Ки јавер страна таро море, о Израелција фалинена сине е Јехова гиљаја: „Гиљавен е Јеховаске, соске сикавѓа пли сила. Е војска заедно е грастенцар фрдинѓа лен ко море“. Џикоте сарине гиљавена сине, о џувља кхелена сине хем башалена ко дајре. Сарине сине бут радосна соске сине ослободиме.