Keda šungja o faraoni kaj o Izraelcija gele peske taro Egipet, pelo pišmani so mukhlja len. Ov naredingja pe vojskake: „Spreminen tumare kočie hem te dža pali lende. Na valjani sine te mukha len te džan peske“. O faraoni hem leskere manuša gele palo Izraelcija.

Te šaj te vodinel ple narodo, o Jehova diveskoro koristinela sine oblako, a rakjate jag. Ov ingargja len dži ko Crveno More hem phengja lenge te čhiven adari šatorija.

Palo adava, o Izraelcija dikhle sar o faraoni hem leskiri vojska avena pali lende. Ola sine ki stapica, tari jekh strana sine o more, a tari javer strana sine i egipetsko vojska. O manuša but darandile hem počmingje te vikinen e Mojsejeske: „Ka mera! Valjangjan te mukhe amen ko Egipet!“ Ama, o Mojsej vakergja lenge: „Ma daran. Adžikeren hem dikhen sar o Jehova ka spasinel amen“. E Mojseje sine le bari doverba ko Jehova, neli?

O Jehova vakergja e Izraelconge te kheden o šatorija. Adaja rat, o Jehova adava oblako čhivgja le maškar lende hem o Egipkjajna. Tegani tari strana e Egipkjanengiri sine temnica, a tari strana e Izraelcongiri sine svetlo.

O Jehova vakergja e Mojsejeske te pružinel po vas upro more. Tegani o Jehova kergja bari balval te phudel celo rat. I balval  delingja o more ko duj hem ki sredina phravdilo drumo. Agjaar, sa o Izraelcija nakhle o more ko šuko, a taro solduj strane sine zidija taro pani.

I vojska e faraoneskiri geli palo Izraelcija taro isto drumo maškar o more. Tegani o Jehova kergja zbrka maškar o vojnikija. O trkalakija taro lengere kočie počmingje te ikljon. O vojnikija vikinena sine: „Te naša akatar! O Jehova borinela pe baši lende“.

O Jehova vakergja e Mojsejeske: „Pružin tlo vas upro more“. Taro jekh puti o more phanlilo upri celo egipetsko vojska. Tegani o faraoni hem leskiri vojska mule. Nijekh lendar na ačhilo dživdo.

Ki javer strana taro more, o Izraelcija falinena sine e Jehova giljaja: „Giljaven e Jehovaske, soske sikavgja pli sila. E vojska zaedno e grastencar frdingja len ko more“. Džikote sarine giljavena sine, o džuvlja khelena sine hem bašalena ko dajre. Sarine sine but radosna soske sine oslobodime.