22. PRIČA
O čudo ko Crveno more
Ked o faraon šundža so o Izraelcija dželje ando Egipat, kajindža pe so mukhlja ljen. Ov naredindža pe vojskače: „Spreminen tumare kočije hem hajde te dža palo ljende. Na valjandžam te mukha ljen te džan.“ O faraon hem oljese manuša dželje palo Izraelcija.
Te šaj te vodini peklje narodo, o Jehova diveste koristindža o oblako, a račate i jag. Ov igardža ljen dži ko Crveno More hem phendža ljendže te čhiven pese uduri šatorija.
Palo odova, o Izraelcija dikhlje sar o faraon hem oljesi vojska avena palo ljende. On hine ki zamka, andi jekh strana hine o more, a andi aver strana hine i egipatsko vojska. O manuša but darandilje hem phendže e Mojsijese: „Ka mera! Valjandžan te mukhe amen ko Egipat!“ Ama, o Mojsije phendža ljendže: „Ma daran. Adžičeren hem dikhen sar o Jehova ka spasini amen.“ O Mojsije hine lje baro poverenje ko Jehova.
O Jehova phendža e Izraelcendže te čeden o šatorija. Odija rat, o Jehova čhivdža o oblako maškaro ljende hem o Egipćanja. Tegani ki e Egipćanengi strana hine tomnina, a ki e Izraelcengi strana hine svetlo.
O Jehova phendža e Mojsijese te pružini po vas upro more. Tegani o Jehova čerdža bari bavlal te phudel celo rat. I bavlal delindža o more ko duj strane hem ko maškar phravdilo o drumo. Adžahar, sa o Izraelcija nakhlje ki šuki phuv, a ando solduj strane hine zidija ando pani.
E faraonesi vojska dželji palo Izraelcija ko odova šuko drumo ko more. Tegani o Jehova čerdža o vojnikija te zbuninen pe hem te na džanen kuri te džan. O točkija ando oljenge kočije počmindže te ikljon. O vojnikija pištindže: „Hajde te naša akatar! O Jehova borini pe oljendže.“
O Jehova phendža e Mojsijese te pružini po vas upro more. Ando jekh puti o panja ando more učhardže i egipatsko vojska. O faraon hem oljesi vojska mulje. Nijekh oljendar na ačhilo dživdo.
Ki aver strana ando more, o Izraelcija slavindže e Jehova džiljaja: „Džilaben e Jehovase, sose mothovdža piklji moć. Fordindža e vojska zajedno e grastencar ko more.“ Dži sarine džilabdže, o džuvlja čheldže hem bašaldže ko daire. Sare hine but radosna sose hine oslobodime.
„Odoljese hrabro šaj te vačera: ’O Jehova tano mo pomoćniko, na ka darav. So šaj te čerel maje o manuš?‘“ (Jevrejima 13:6)
