Mudabva Farau kuti Aisraeli abuluka mu Ejito, iye acinja manyerezero ace thangwi yakuatawirisa kuenda. Iye apanga anyakutekenya ngolo: ‘Gumanyani ngolo zonsene za nkhondo, tiatowerere! Nee tisafunika kuasiya kuti aende.’ Iye na anyankhondo ace atoma kuthamangira Aisraeli.

Yahova akhatsogolera mbumba yace, namasikati akhaphatisira khole, namasiku akhaphatisira moto. Iye aatsogolera mpaka ku Bara Yakufwira, mbaapanga kuti amange misasa.

Buluka penepo, Aisraeli aona Farau na anyankhondo ace mbakaatowera. Iwo akhadafungirwa na bara, pontho na anyankhondo a Ejito. Iwo akhuwira Mose: ‘Ife tinaphiwa! Mbapidakhala pyadidi kutisiya pyako ku Ejito.’ Mose alonga: ‘Lekani kugopa. Dikhirani na onani njira inafuna kutipulumusa Yahova.’ Mose akhanyindira kakamwe Yahova, simomwene tayu?

Yahova apanga Aisraeli toera akhunganyike toera kubuluka. Ntsiku ineyi namasiku, Yahova acitisa kuti khole ikhale pakati, uku Aejito, khundu inango Aisraeli. Kukhundu ya Aejito kukhali na cidima. Mbwenye kukhundu ya Aisraeli kukhali na ceza.

 Yahova apanga Mose toera afuthule manja ace mbathonya bara. Penepo Yahova acitisa mphepo ikulu masiku onsene. Bara yagawika, pakati mbapakhala na njira. Aisraeli onsene apita na njira ineyi mbafamba pa mataka akuuma mpaka kuntunda.

Anyankhondo a Farau atowerera Aisraeli mbafambambo pakati pa bara, pa mataka akuuma. Buluka penepo, Yahova acitisa kuti acimwane kufamba mwadidi. Maroda a ngolo atoma buluka. Anyankhondo akhuwa: ‘Tendeni tithawe! Yahova akuamenyera nkhondo.’

Yahova apanga Mose: ‘Futhula manja ako mbuthonya bara.’ Natenepa, madzi abwerera mbabiza anyankhondo a Ejito. Farau na anyankhondo ace afa. Nee m’bodzi mwa iwo adapulumuka.

Kukhundu inango ya bara, mwinji ukulu wa Aisraeli ukhasimba Mulungu na nyimbo: ‘Imbirani Yahova, thangwi apangiza ukulu wace. Aponya m’bara makavalo na anthu adakwira pa makavalo.’ Mu ndzidzi ukhaimba mbumba, akazi akhabvina, pontho akhamenya ng’oma. Cincino onsene ali akutsandzaya thangwi ya cisudzulo candimomwene.