Feriooni Israeelete manni Gibitsete gobbanni haˈrinota afiti, mayi haˈrisalla hoogo yee gaabbi. Isi olantosi togo yee hajaji: ‘Insa faana ganne haˈneemmona faradi-gaareˈya baala qixxeesse! Konne manna agura dihasiissannonke.’ Feriooni olantosi ledo Israeelete manna hordofi.

Hatte yannara Yihowa mannasi barra gomichunni, hashsha kayinni giiratenni massaginonsa. Isi insa Duumu Baariwa qole haaˈre haˈrinsa; Maganu insa hadhanno woyite dunkaana qasidhe galtanno gede kulinonsa.

Israeele, Feriooninna olantosi badheenni dagganni noonsata laˈu. Israeelete mannira albansaanni baaru no; badhensaanni qole Gibitsete olanto hordoffanni noonsa. Konni daafira insa Musewa higge togo yite raartu: ‘Goonfammoraati! Gibitsete heeˈnoommoro woyyannonke!’ Muse kayinni togo yiinsa: ‘Waajjitinoonte. Yihowa gatisannonke gara laˈinannina agarre.’ Muse Yihowa seekke ammanino, dihattooti?

Yihowa Israeelete manni dunkaanansa diiganno gede kulinsa. Hakko hashsha Yihowa Israeeletenna Gibitsete olanto mereero gomicho wori. Gibitsete olanto noowi tunsichoho. Israeelete manni noowi kayinni xawaabbaho.

 Yihowa Muse angasi baaru aana diriirsanno gede kulisi. Hakkiinni Yihowa hashsha woˈma wolqaataame bubbe bubbissanno gede assi. Baaru lamewa badamita saˈnanni doogo kalaqantu. Lowo miliyoone ikkannohu Israeelete manni wayi gammalu gede ikke uurreenna moola baatto kaxxe sai.

Feriooni olanto Israeelete manna hordoffe baaru giddora eˈu. Hakkiinni Yihowa Gibitsete olantora garu baˈˈannonsa gede assi. Faradi-gaarensa qale leqe yite ubbanno gede assi. Hakkiinni Gibitsete olanto, ‘Yihowa Israeelete manna kaaˈlanni noo daafira kawiinni xoonqo’ yitu.

Yihowa Muse “Angakki baaru aana diriirsi” yiisi. Hakkiinni gammalu gede ikke uurrino wayi Gibitsete olanto aana dirri. Feriooninna olantosi baalanta wayi iti. Insa giddo reyikki gatinohu mittuno dino.

Baaraho kaˈaanni noohu lowohu Israeelete manni togo yaanni Magano galati: ‘Faradonna faradaasine baaru giddo hune, lowo qeelle uyinonkena Yihowara faarsineemmo.’ Mannu faarsanno woyite, meentu dibbe gananni kubbi. Insa Gibitsete borojjimmanni fultino daafira baalunku lowo geeshsha hagiidhitino.