Laha vo nireni-Farao fa niala ta Ejipta ao ty Israelita, le niova hevitsy ndraiky ie ka tsy ta handefa an-drozy. Nivolaniny maramilany rey hoe: ‘Omano kalesy fandesintsika mialy rey, le ndao tsika hania an-drozy! Tsy tokony ho nengantsika nandeha rozy.’ Le nania ani- Israelita rey amy zay ie, niaraky amy maramilany rey.

Nitariky ani-vahoakiny rey Jehovah, ka nampiasa rahona lafa atoandro, le afo lafa haly. Nitarihiny nana amy Riaky Mena eo tse rozy, le nampananganiny tranolay.

Nihitani-Israelita rey amy zay hoe nania an-drozy Farao miaraky amy maramilany rey. Tsy nisy nombà sasy rozy satria aloha etia Riaky Mena iny, le afara ao maramila ejipsianina rey. Nimenimeny tamy Mosesy rozy hoe: ‘Maty tsika! Nanino laha nenganao ta Ejipta ao avao zahay.’ Le hoy Mosesy: ‘Ka matahotsy. Mitsangana, le henteo ty hanavotani-Jehovah antsika.’ Natoky ani-Jehovah vatany Mosesy!

Tamy haly iny avao, le nivolanini-Jehovah Israelita rey soa hahoron- drozy ty tranolain-drozy. Nafindrani-Jehovah amy zay rahona iny, le iny ty nampisaraky ani-Israelita noho Ejipsianina rey. Naìky ty tamy Ejipsianina rey tao, fa tamy Israelita rey tao nazava.

Nivola tamy Mosesy Jehovah hoe: ‘Amparo mana amy riaky io any ty tananao.’ Nandefa tsioky mahery amy zay Jehovah tamy haly iny, le  nizara roe riaky iny ka nisy lala tanivony teo. Nandeha amy tany maiky amy zay Israelita maro biby rey.

Nanaraky ani-Israelita rey mbamy riaky iny mbeo ty maramilani- Farao. Nakorontani-Jehovah amy zay rozy lafa tanivo teny. Nipotaky laròni-kalesin-drozy rey. Nikorakoraky maramila rey hoe: ‘Ndao hiala etoa, fa Jehovah vatany ro mialy ho an-drozy!’

Hoy Jehovah tamy Mosesy: ‘Amparo mana amy riaky io any ty tananao.’ Avy le nimpoly amy pilasiny ndraiky rano iny, ka matimaty iaby maramila Ejipsianina rey. Nimaty koa Farao. Tsy nisy nivelo rozy ndre raiky.

Nidera a Ndranahary Israelita maro biby rey, ka nihira hoe: “Hihira ho ani-Jehovah aho, fa nisondrotsy farany anabo ie. Natorakiny tan-driaky ao ty sôvaly noho ty mpitikitsy azy.” Nitsinjaky iaby ampela rey sady nititiky aponga. Nifalifaly biby rozy iaby. Afaky vatany rozy henanizay!