Su tempong i Firaun nakaringihẹ̌ tau Israel seng siměbang bọu Misirẹ̌, tiněnane nẹ̌bal᷊ui. I sie nẹ̌parenta su manga prajurite, ’Sadiako kěbị karetang perang, kụ bọete i kitẹ měnahusu si sire! I kitẹ tawe wotonge měmala si sire matamai.’ Bọu ene i Firaun dingangu manga prajurite něnahusu tau Israel.

Yehuwa něngahạ tau Israel dingangu binawa su tempong ěllo dingangu putung su tempong hěbi. I Sie nẹ̌bawa si sire sarang Laudẹ̌ Mahamụ, kụ něngoro si sire pẹ̌kema su tampạ ene.

Bọu ene, i sire nakasilo i Firaun dingangu manga prajurite něnahusu si sire. I sire seng tawe makatal᷊ang. Su likudi sire piạ i Firaun dingangu manga prajurite, kụ su těngong i sire piạ Laudẹ̌ Mahamụ. I sire naul᷊ị si Musa, ’I kitẹ sarung mate! Ěngkedung balạe i kami tatapẹ̌ su Misirẹ̌.’ Katewe i Musa naul᷊ị si sire, ’Abe katakụ, Yehuwa sarung měnal᷊amatẹ̌ si kitẹ.’ Musa kahěngang-hěngang mangimang si Yehuwa.

Yehuwa něngoro su tau Israel pẹ̌sasadia gunang saụ dumal᷊eng. Su hěbi ene, Yehuwa něngal᷊ing binawa ene sarang tal᷊oarang tau Israel dingangu tau Misirẹ̌. Su tau Misirẹ̌ nakoạ marěndung, katewe su tau Israel nakoạ matualagẹ̌.

 Yehuwa něngoro si Musa pěhengkẹ těkinge sarang laudẹ̌. Bọu ene, Yehuwa někoạ anging maihạ timiụ su kanandụu hěbi ene. Laudẹ̌ ene napahiạ, kụ su tal᷊oarane piạ dal᷊eng. Jutane tau Israel dimal᷊eng su ěntana mamara. Akẹ u laudẹ̌ nakoạ darěndung su koaneng dingangu kaihing i sire.

Pasukan i Firaun timol᷊e si sire dimal᷊eng su ěntana mamara ene. Bọu ene, Yehuwa někoạ pasukan ene nẹ̌kal᷊iasẹ̌. Manga bolang karetang i sire nasawụ. Manga prajurit ene němansagẹ̌, ’Tal᷊ang lighạ! Nẹ̌seke gunang i sire ene kai i Yehuwa.’

Yehuwa naul᷊ị si Musa, ’Hengkẹ těkingu sarang laudẹ̌.’ Darěndung akẹ ene apidu nanawọ su pasukan Misirẹ̌. Firaun dingangu kěbị prajurite nate. Tawẹ apa sarang sěngkatau nasal᷊amatẹ̌.

Su sěmběkane, kěbị taumata nẹ̌kantarị nẹ̌dalo si Yehuwa, ’Pẹ̌dalọe gunang Yehuwa, ual᷊ingu i Sie seng nakauntung. Kawal᷊o dingangu sumasakene nirěmẹ’E sarang laudẹ̌.’ Manga wawine nẹ̌sal᷊ai apidu měnẹ̌nalang rěbana. Kěbị taumata sěbạe mal᷊uasẹ̌ ual᷊ingu i sire seng nawebasẹ̌.