Bainhira Faraó rona katak ema Izraél sai ona husi Ejitu, nia troka ninia hanoin. Nia haruka ninia tropa sira: ‘Prepara kuda-karreta funu nian, no mai ita duni tuir sira! Ita labele husik sira bá.’ Faraó no ninia tropa sira komesa duni tuir ema Izraél.

Jeová dirije ninia povu hodi uza kalohan durante loron no ahi durante kalan. Nia lori sira toʼo besik Tasi Mean, no haruka sira atu harii tenda.

Tuirmai ema Izraél haree Faraó no ninia tropa besik atu toman sira. Sira iha klaran entre tasi no tropa Ejitu. Sira hakilar ba Moisés: ‘Ita sei mate! Diʼak liu husik ami iha Ejitu deʼit.’ Maibé Moisés hatete: ‘Keta taʼuk, Jeová sei salva ita.’ Moisés tau fiar duni ba Jeová, loos ka lae?

Jeová haruka ema Izraél atu prepara an no kontinua halo viajen. Iha kalan neʼebá, Jeová muda kalohan no tau entre ema Ejitu no ema Izraél. Neʼe halo ema Ejitu nia área nakukun, maibé ema Izraél nia área naroman.

Jeová haruka Moisés atu lolo ninia ai-tonka ba tasi. Tuirmai Jeová halo anin huu makaʼas kalan tomak. Neʼe halo tasi fahe  ba rua, no iha klaran mak dalan atu laʼo. Ema Izraél barak tebes laʼo iha fatin maran neʼe, no iha sira-nia sorin-sorin mak tasi neʼebé hanesan moru.

Faraó nia tropa duni tuir ema Izraél toʼo fatin maran neʼe. Tuirmai Jeová halo tropa lubun neʼe runguranga. Sira-nia kuda-karreta nia roda sira monu sai. Tropa sira-neʼe hakilar: ‘Mai ita halai! Jeová mak halo funu ba sira.’

Jeová dehan ba Moisés: ‘Lolo ó-nia ai-tonka ba tasi.’ Derrepente deʼit, bee neʼebé hanesan moru fakar tun ba tropa Ejitu tomak. Faraó no ninia tropa hotu mate. La iha ida mak moris.

Iha tasi sorin, ema Izraél hahiʼi Jeová ho knananuk: ‘Mai ita kanta ba Jeová, tanba ninia glória mak boot tebes. Nia soe tiha kuda no tropa neʼebé saʼe kuda ba tasi kleʼan.’ Feto sira dansa no baku tamborín. Ema hotu kontente tanba sira livre ona.