Naho fa nirey i Farao tie nandeha o Israelitao, le niova hevetse indraike reke. Hoe reke tamo o maramila’eo: ‘Omano iaby o galesa findesegne mialio, le andao ho heagnegne fa tsy toko’e nalefantika iareo.’ Nandeha nagneagne o Israelitao amy izay iareo.

Nampiasa rahogne ty Jehovah naho fa atoandro, le afo naho fa halegne mba hitarihagne o vahoa’eo. Nente’e mbamy i Riake Menay mbeo iareo sady nampitobe’e teo.

Talake o Israelitao tie nagneagne iareo ty Farao naho o maramila’eo. Tratse ampagnivoa i Riake Menay eo naho i tafike Ejipsianay eo iareo. Nitaraigne tamy i Mosesy iareo tie: ‘Ho mate tikagne ty androany! Toko’e ho nenga’o ta Ejipta agne avao zahay.’ Faie hoe ty Mosesy: ‘Ko matahotse nareo, fa henteo soa ty hagnavota i Jehovah antikagne.’ Trea tamo o reha’eo tie natoky i Jehovah vata’e ty Mosesy.

Nampialàe i Jehovah teo o Israelitao. Tamy i halegne igne avao, le nafindra i Jehovah tampagnivoa o Israelitao eo naho o Ejipsianao eo i rahogney mba hampisarake iareo. Nazava ty tamo o Israelitao ao fa naiegne ty tamo o Ejipsianao ao.

 Nampanondroe i Jehovah i Riake Menay ty tagna i Mosesy. Avy eo nampisy tio-bey ty Jehovah tamy i halegney, le nizara roe i riakey sady nanjare nisy lalagne ty tagnivo’eo. Nandia tane maike amy izay o Israelitao tagnivo i riakey eo.

Nagnorike mbeo ka i maramila Ejipsiana rey. Nakoronta i Jehovah i maramila rey sady nafakafaha’e iaby ty larò i galesa iareoy. Nitaraigne amy izay iareo tie: ‘Andao hiheregne fa i Jehovah ty mialy amantika.’

Nisaontsia i Jehovah ty Mosesy tie: ‘Atondrò mbambone i riakey ey i tagna’oy.’ Nakopo i riakey indraike avao i Ejipsiana rey, le nimate ao ty Farao miharo iareo fa tsy nisy velogne.

Nifale sady nidera i Jehovah tamy ty hira o Israelita reo tandafe i riakey ey tie: “Mihira hoahy i Jehovah fa ie ty mahery fara tampo’e. Natora’e agnate riake agne ty soavala naho ty mpitingitse aze.” Nitsinjake sady nijera langorogne ty roakemba iareo tamy izay. Fale iaby iareo fa niavotse.