ʻI he fanongo pē ʻa Felo kuo mavahe ʻa e kau ʻIsilelí mei ʻIsipité, naʻe liliu ʻene fakakaukaú fekauʻaki mo hono tuku kinautolu ke nau mavahé. Naʻá ne tuʻutuʻuni ki heʻene kau taú: ‘Teuteuʻi ke maau ʻa ʻeku ngaahi saliote taú, pea tau tulimui ʻiate kinautolu! Naʻe ʻikai totonu ke tau tuku ange kinautolu ke nau ō.’ Naʻe kamata ke ne tulimui mo ʻene kau tangatá ʻi he kau ʻIsilelí.

Naʻe taki ʻe Sihova ʻa hono kakaí, ʻo ne ngāueʻaki ha konga ʻao ʻi he taimi ʻahó pea mo e afi ʻi he taimi poʻulí. Naʻá ne taki kinautolu ki he Tahi Kulokulá, peá ne tala kiate kinautolu ke nau fokotuʻu tēniti ai.

Hili iá naʻe sio atu ʻa e kau ʻIsilelí kia Felo mo ʻene kau taú ʻoku nau tulimui mai ʻiate kinautolu. Naʻa nau fihia ʻi he vahaʻa ʻo e tahí mo e kau tau ʻIsipité. Naʻa nau tangi kia Mōsese: ‘Ko kimautolú te mau mate! Naʻe totonu ke ke tuku pē kimautolu ʻi ʻIsipite.’ Ka naʻe pehē ange ʻe Mōsese: ‘ʻOua te mou ilifia. Tatali ʻo sio ki hono fakahaofi kitautolu ʻe Sihová.’ Naʻe falala moʻoni ʻa Mōsese kia Sihova, ʻikai ko ia?

Naʻe tala ʻe Sihova ki he kau ʻIsilelí ke veteki ʻa e tēnití. ʻI he pō ko iá, naʻe hiki ʻe Sihova ʻa e konga ʻaó ʻo ne fokotuʻu ʻi he vahaʻa ʻo e kau ʻIsipité mo e kau ʻIsilelí. ʻI he tafaʻaki ʻo e kau ʻIsipité, naʻe fakapoʻulituʻu. Ka ʻi he tafaʻaki ʻo e kau ʻIsilelí, naʻe maama.

Naʻe tala ʻe Sihova kia Mōsese ke mafao atu hono nimá ki he tahí.  Naʻe ʻai leva ʻe Sihova ke tō ha fuʻu matangi mālohi ʻi he poó kotoa. Naʻe mavaeua ʻa e tahí, pea naʻe ʻi ai ha hala ʻi loto-mālie. Naʻe laka atu ʻa e laui miliona ʻo e kau ʻIsilelí ʻi he kelekele mōmoá, ʻi he vahaʻa ʻo e kauʻā vaí, ki he tafaʻaki ʻe tahá.

Naʻe muimui atu ʻa e kau tau ʻa Feló ʻi he kau ʻIsilelí ki he kilisitahi mōmoá. Naʻe ʻai leva ʻe Sihova ke puputuʻu ʻa e kau taú. Naʻe kamata ke homo ʻa e vaʻe ʻo ʻenau ngaahi salioté. Naʻe kaila ʻa e kau sōtiá: ‘Tau hola mei heni! ʻOku tau ʻa Sihova maʻanautolu.’

Naʻe tala ʻe Sihova kia Mōsese: ‘Mafao atu ho nimá ki he tahí.’ ʻI he taimi pē ko iá, naʻe holo hifo ai ʻa e fuʻu kauʻā vaí ki he kau tau ʻIsipité. Naʻe mate ʻa Felo mo ʻene kau tangatá kotoa. Naʻe ʻikai ha taha ʻiate kinautolu ʻe hao.

ʻI he tafaʻaki ʻe taha ʻo e tahí, naʻe fakahīkihikiʻi ai ʻe he fuʻu kakaí ʻa e ʻOtuá ʻaki ha hiva: “Hiva kia Sihova, he kuo hoko ʻo hakeakiʻi lahi ia. Ko e hōsí mo ia ʻoku heka aí kuó ne fakapuna ki he tahí.” Lolotonga ʻa e hiva ʻa e kakaí, naʻe hula ʻa e kakai fefiné mo nau tā nafa. Naʻe fiefia lahi ʻa e tokotaha kotoa he ko eni kuo nau tauʻatāina moʻoni.