Eci Fareo a yeva okuti va Isareli va siapo ofeka Yegito, eye wa pongolola ocisimĩlo caye coku va eca. Eye wa tuma asualali vaye hati: ‘Angiliyi akãlu ange osi ovita, tu va landuli! Ka tu ka eceleli okuti va enda.’ Eye kumue lasualali vaye va fetika oku landula va Isareli.

Yehova wa endisa afendeli vaye, poku va songuila lelende vokuenda kutanya kuenda ulienge wondalu vokuenda kuteke. Eye wa va songuila toke Vokalunga Kakusuka kuenje wa va sapuila oco va tunge ocilombo.

Kuenje va Isareli va mola okuti Fareo kumue lasualali vaye va kala oku va landula. Kovaso ya va Isareli kua kala okalunga kuenda olohoka via va Egito via kala oku iya konyima yavo. Ovo va kalukila Mose vati: ‘Tu kasi loku fa! Hĩse da wa tu sile Kegito.’ Pole, Mose wa popia hati: ‘Ko ka kuati usumba. Talameli kuenda tali ndomo Yehova a tu popela.’ Ku tava hẽ okuti Mose wa kolelele ku Yehova?

Yehova wa sapuila va Isareli oco va tunde vocilombo. Kuteke waco, Yehova wa kapa elende limue pokati ka va Egito la va Isareli. Konele ya va Egito kua kala owelema. Pole, konele ya va Isareli kua kala ocinyi.

Yehova wa sapuila Mose oco oluĩle eka liaye vokalunga. Kuenje Yehova wa nena ofela yalua vokuenda kuteke wosi. Okalunga ka  litepa pokati kuenje vokati kaco mua linga onjila. Olohuluwa via va Isareli via endela posi ya kukuta pokati kovimbaka viovava oco va yoke kesinya likuavo.

Olohoka via Fareo via kuama va Isareli toke posi ya kukuta vokalunga. Kuenje Yehova wa lingisa okuti, olohoka viaco vi kuata ovitangi. Alola akãlu avo a fetika oku tundako. Kuenje asualali va kaluka vati: ‘Tu tundi kulo! Momo Yehova o kasi oku va yakelako.’

Yehova wa sapuila Mose hati: ‘Oluĩla eka liove kilu liokalunga.’ Kuenje vepuluvi liaco, ovava a lunduluila olohoka via va Egito. Fareo kumue lolohoka viaye viosi, va fa. Lomue pokati kavo wa siala lomuenyo.

Konele yikuavo yokalunga, owiñi walua wa kala oku sivaya Suku locisungo cimue vati: “Njimbila Yehova, momo eye wa kemãlisiwa calua. Okavalu lu wa endelako wa va imba vokalunga.” Osimbu omanu va kala oku imba, akãi va kala oku piluka kuenda oku sika oloñoma. Omanu vosi va sanjuka calua momo kaliye va yovuiwa.