Nga u ṱavhanya musi Farao a tshi pfa uri Vhaisiraele vho ṱuwa Egipita, a thoma u ḓisola nge a vha tendela vha tshi ṱuwa. A laedza mmbi yawe a ri: ‘Lugisani gariki dza nndwa nahone ri vha pandamedze! Ro vha ri songo tea u vha tendela vha tshi ṱuwa.’ Ene na vhanna vhawe vha thoma u pandamedza Vhaisiraele.

Yehova o vha o ranga phanḓa vhathu vhawe, a tshi shumisa gole masiari na mulilo vhusiku. A vha isa Lwanzheni Lutswuku nahone a vha vhudza u ri vha athe madennde henefho.

Nga murahu, Vhaisiraele vha vhona Farao na mmbi yawe vha tshi khou vha pandamedza. Vho vha vho hanganea vhukati ha lwanzhe na mmbi ya Vhaegipita. Vha lilela Mushe vha ri: ‘Ndi hone ro fa! Ngavhe ni ri litshe henengei Egipita.’ Fhedzi Mushe a ri: ‘Ni songo ofha. Imani no khwaṱha nahone ni vhone Yehova a tshi ri tshidza.’ Mushe o fulufhela Yehova tshoṱhe, a si zwone?

Yehova a vhudza Vhaisiraele uri vha ḓilugise. Vhusikuni honoho, Yehova a sudzulusa gole nahone a ḽi isa vhukati ha Vhaegipita na Vhaisiraele. Kha thungo ya Vhaegipita, ha vha na swiswi. Fhedzi kha thungo ya Vhaisiraele, ha vha na tshedza.

Yehova a vhudza Mushe uri a ṱharamudzele tshanḓa tshawe lwanzheni. Nga murahu, Yehova a ita uri muya wa maanḓa u  vhudzule vhusiku hoṱhe. Lwanzhe lwa fhandekana nahone ha vha na nḓila vhukati halwo. Vhaisiraele vha dzimilioni vha tshimbila ho omaho, vhukati ha mbondo dza maḓi, vha wela lwanzhe.

Mmbi ya Farao ya tevhela Vhaisiraele lwanzheni lwo omaho. Yehova a ita uri mmbi i ḓaḓe. A ita uri malinga a gariki dzavho a ṱomowe.’ Maswole a vhidzelela a ri: ‘Kha ri shavhe! Yehova u khou vha lwela.’

Yehova a vhudza Mushe a ri: ‘Imiselani tshanḓa tshaṋu nṱha ha lwanzhe.’ Nga u ṱavhanya, mbondo dza maḓi dza wela mmbi ya Vhaegipita. Farao na vhanna vhawe vhoṱhe vha fa. A hu na we a ponyoka.

Seli ha lwanzhe, gogo ḽihulwane ḽo hulisa Mudzimu nga luimbo ḽa ri: “Kha ndi imbe lwa Yehova, we a takuwa a ima, We mbiḓi na vhathu a thudza zwa wela lwanzheni.” Musi vhathu vha tshi khou imba, vhafumakadzi vho tshina na u lidza mirumba. Vhoṱhe vho vha vho takala nga u ḓivha uri zwino vho vhofholowa tshoṱhe.