Han hinbaroan han Paraon nga binaya na an mga Israelita ha Ehipto, nagbag-o an iya hunahuna. Ginsugo niya an iya kasundalohan: ‘Andama an ngatanan ko nga karuwahe ha pakig-away, ngan lanaton ta hira! Waray unta naton hira palakta.’ Ira ginlanat an mga Israelita.

Gin-giyahan ni Jehova an iya katawohan pinaagi hin dampog ha aga ngan hin kalayo ha gab-i. Gintugwayan niya hira ngadto ha Dagat nga Pula, ngan ginsugo nga magkampo didto.

Tapos nakita han mga Israelita nga ginlalanat hira han Paraon ngan han iya kasundalohan. Waray na hira makakadtoan kay nabubutngaan hira han kadagatan ngan han kasundalohan han Ehipto. Nangaraba hira kan Moises: ‘Mamamatay na kita! Imo na la unta kami ginbayaan ha Ehipto.’ Pero hi Moises nagsiring: ‘Ayaw kamo kahadlok. Paghulat ngan kitaa kon paonan-o kita tatalwason ni Jehova.’ Nasarig gud hi Moises kan Jehova, diri ba?

Ginsidngan ni Jehova an mga Israelita nga mag-andam paglarga. Hito nga gab-i, iginbalhin ni Jehova an dampog ngadto ha butnga han mga Ehiptohanon ngan han mga Israelita. Ha dapit han mga Ehiptohanon, masirom. Pero ha mga Israelita, mahayag.

Ginsugo ni Jehova hi Moises nga unaton an iya kamot ngadto ha dagat. Kahuman, ginpahinabo ni Jehova nga magkaada makusog nga hangin ha  bug-os nga gab-i. Natunga an dagat ngan nagkaada aragian ha butnga hito. Tumabok an minilyon nga Israelita ha mamara nga tuna, ha butnga han sugad hin pader nga tubig.

Ginlanat han kasundalohan han Paraon an mga Israelita ha nagmara nga dagat. Tapos ginsamok ni Jehova an kasundalohan. Natangtang an mga kaliding han ira mga karuwahe. An kasundalohan nagsinggit: ‘Iwas kita dinhi! Hi Jehova nakikig-away para ha ira.’

Ginsidngan ni Jehova hi Moises: ‘Unata an imo kamot ngadto ha dagat.’ Tigda nga binalik an sugad hin pader nga tubig ha normal nga kahimtang ngan nalumos an Paraon ngan an iya kasundalohan. Ngatanan hira namatay.

Ha tabok han dagat, gindayaw han mga Israelita an Dios pinaagi hin kanta: ‘Pagkanta kan Jehova, kay hiya nagdaog nga mahimayaon. An kabayo ngan an sakay hito nahilabog ha dagat.’ Samtang nagkakanta an katawohan, an kababayin-an nasayaw ngan nagpapatokar hin tamborin. Malipayon hinduro an ngatanan kay may kagawasan na gud hira.