Niaraka Farao naharen̈y Israelita aby io niala ta Ezipta, izy efa niova hevitry edy! Izy nivolan̈a tamy maramilanany: ‘Amboara malaky kalesy findesintsika miady fa atsika handeha han̈ian̈a iro! Iro tsy tokony nalefantsika.’ Nian̈iny Farao ndreky olonany Israelita aby io.

Jehovah nitariky olonany aby io. Izy nampiasa rondro koa fa nazava andra, fa motro lera andra alin̈y. Nindesiny tamy Ranomasin̈y Mena iro. Iro nirahiny nitoby tio.

Hitandro Israelita aby io fa nan̈ian̈a iro Farao ndreky maramilanany. Fampin̈y lalan̈andro fotony ranomasin̈y talohandro, baka io maramilany Farao tafarandro. Iro neloko tamy Mosesy: ‘Anao fo nampiala zahay ta Ezipta tan̈y. Eto eky baka ifantesantsika!’ Mosesy nivolan̈a: ‘Aza mavozo. Diasa baka! Zahava akory ataony Jehovah hamonjy atsika.’ Natoky Jehovah mare Mosesy, tsy zen̈y?

Nirahiny Jehovah nandeha iro Israelita aby io koa fa alin̈y andra. Nafindrany Jehovah tan̈ivony Israelita ndreky Ezipsianin̈y rondro in̈y. Taminy Israelita aby io nazava, fa nahiziky taminy Ezipsianin̈y aby io.

 Nirahiny Jehovah nan̈enjan̈a tan̈ana ndreky nanondro ranomasin̈y Mosesy. Nataony Jehovah nisy tsiko mare nampikiaka andra. Nisaraka aroe ranomasin̈y, baka io nisy lalan̈a nety nandihanan̈a tan̈ivonizio. Israelita antapitrisany nan̈araka lalan̈a io, nandia tany maiky. Ranomasin̈y ambadiky ambadiky.

Mbala tsy nimpody fo iry Farao, fa mbala nan̈araka iro Israelita aby io fo. Nampialamboetry maramila aby io Jehovah. Napoapoaka larony kalesindro. Maramila aby io niafatrafatra: ‘Alo atsika himpody fa Jehovah kony miady amintsika e!’

Ho Jehovah tamy Mosesy: ‘Tondroe amy tan̈anao ranomasin̈y io.’ Niaraka tamy zen̈y, nifody ranomasin̈y. Tsy tafiboaka maramila ezipsianin̈y. Naty Farao ndreky olonany jiaby. Tsisy velon̈o.

Nidera Zan̈ahary iro Israelita aby io izikoa fa tafitsaka, ke nihira: ‘Mihirà niny Jehovah, fa nanjary farany an̈abo izy. Navariny andranomasin̈y an̈y sevaly ndreky olo nitenginy iro io.’ Man̈angy aby io nitsinjaka ndreky nively amponga. Olo jiaby ravoravo mare fotony navotany Jehovah.