Ora gunna Faraón maʼ biree ca israelita de Egipto, guca arrepentir xiñee bidii lugar zécabe. Biʼniʼ mandarbe ca soldadu stibe: «Lacuu listu guiráʼ carru de guerra stinneʼ. Ne chinándanu laacabe. Pa ñánnanu qué nudiʼnu lugar ñécabe». Óraque, bireebe ne ca soldadu stibe zinándacabe ca israelita.

Biquiiñeʼ Jiobá ti za ridxíʼ, ne ti columna de gui huaxhinni para gabi xquidxi pa ladu cheʼ. Yené Jiobá laacabe ruaa nisadóʼ Xiñáʼ ne gudxi laacabe guiaanacabe raqué.

Málasi, biiyaʼ ca israelita nanda Faraón ne ejércitu stiʼ laacaʼ. Biaana ca israelita que galaa, ti ladu que nuu nisadóʼ ne sti ladu que zeeda ejércitu stiʼ Egipto. Bizulú bicaacabe ridxi ne rábicabe Moisés: «¡Zátinu! ¿Xi para guleeluʼ laadu de Egipto?». Para ná Moisés rabi laacabe: «Cadi guidxíbitu. Lacueza ne laguuyaʼ modo gulá Jiobá laanu». ¿Cadi dxandíʼ gupa Moisés confianza Jiobá la?

Despué, gudxi Jiobá ca israelita gutópacaʼ guiráʼ cosa sticaʼ. Gueelaʼ que, biniibi Jiobá za que ne guluu ni galaa de ca israelita ne ca egipciu. Ladu nuu ca egipciu que nacahui, peru ladu nuu ca israelita que nayaʼniʼ.

Óraque gudxi Jiobá Moisés gusigaanáʼ lu nisadóʼ que. Biseendaʼ Jiobá ti bi ni bindubi guidubi gueelaʼ. Bixeleʼ nisadóʼ que, ne bixeleʼ ti neza  ndaaniʼ ni. Cumu nabidxi neza que, gunda gudiʼdiʼ millón de israelita lade chupa barda nisa dede yendacaʼ sti ladu.

Yenanda Faraón ne ejércitu stiʼ ca israelita ora zidíʼdicaʼ ndaaniʼ nisadóʼ que. Guyuusícabe ndaaniʼ nisa que maʼ qué nidxélacabe xi ñúnicabe purtiʼ Jiobá biʼniʼ de que guiree ca rueda stiʼ ca carru stícabe. Óraque bizulú bicaa ca soldadu que ridxi: «¡Guireʼnu de raríʼ cadinde Jiobá pur xquidxi!».

Para ná Jiobá rabi Moisés: «Bisigaanáʼ lu nisadóʼ ca». Málasi, bizulú biaba ca barda de nisa que luguiáʼ ca egipciu. Guti Faraón ne ejércitu stiʼ. Nin tobi qué nilá.

Cani nuu sti ladu nisadóʼ que, bizulú cayuundacaʼ ti canción para gusisácacaʼ Jiobá: «Zuundaʼ para Jiobá purtiʼ maʼ biluiʼbe pabiáʼ nandxoʼbe. Bilaabe ca maniʼ ne ca binni ni riguiʼbaʼ laacame ndaaniʼ nisadóʼ». Laga cayuundaʼ guidxi que, cuyaa ca gunaa que ne cuxhídxicaʼ pandereta. Guirácabe cayéchecabe purtiʼ yanna huaxa maʼ libre laacabe.