Órni faraón gon que ma bireʼ israelitas lainy gudx Egipto, diti bioladxbu ni bunybu. Gochbu guirá soldad xtunybu: «Colcoʼ puext guirá camión par tzanalno layibu. Diti non naduidyno lagary ñeeyibu». Ór cú faraón né guirá soldad xtunybu goynalyibu israelitas.

Jehová golonés xcudx, rodzu biquiimbu toib xcaay, né gueʼel biquiimbu toib guii. Jehová gonyné xcudx ronoʼ nisdaʼ Xináa né gochbu xcudxbu nasaladx cú.

Después israelitas bibiʼyibu que faraón né guirá soldad xtunybu canal layibu. Israelitas biaʼan galay, tiplad goyoʼ buñ egipcios né stiplad goyoʼ nisdaʼ Xináa. Ór cú gosaló bicaʼyibu rudx Moisés né goniʼyibu: «¡Guiráno saityno! ¿Xigony goleʼlo lóodo Egipto?». Per Moisés cuapy layibu: «Diti guidzuibyto. Colcués né colguibiʼ ximod Jehová salaa lóono». ¿Xiroʼ confianz gop Moisés lóo Jehová ja?

Después Jehová gochbu israelitas que ma nareʼyibu lagarycu. Goxincu, Jehová buny que xcaaycu ñaʼanni galay, buñ egipcios biaʼan tiplad né stiplad biaʼan israelitas. Ro goyoʼ egipcios góc nacay per ro goyoʼ israelitas góc nanídxich.

 Ór cú Jehová gochbu Moisés nascaʼ ña ronoʼ nisdaʼ né Jehová buny que guidopy gueʼelcu ñac toib buroʼdant. Ór cú bixal galaʼ nisdaʼ né góc toib néz galayni né xidalguixo israelitas godudy galay nisdaʼ ló yoovich.

Guirá soldad xtuny faraón goynalyibu xidalguixo israelitas galay nisdaʼ. Per Jehová bunybu que buñ egipcios nasaclóo xidal cós, biaʼax xiyant xcarretyibu. Ór cú guirá soldad egipcios bicadzuʼpyibu rudx: «¡Guixonyno! Portín Jehová cadíil né lóono par guilaabu xcudxbu».

Jehová gochbu Moisés: «Biscaʼ ñalo ló nisdaʼ». Ór cú, xinís nisdaʼ biotzni laidy guirá buñ egipcios. Faraón né guirá soldad xtuny goity. Diti bilaa ni toib.

Stiplad nisdaʼ guirá buñ bunyxiroʼyibu Dios né toib canción: «Goola canción par Jehová portín láabu ma gocxiroʼbu. Mainy né ni dxiip láamu binitlóbu ló nisdaʼ». Laʼga guirá buñ bíilyibu canción, buñgonaʼ biyaʼ né godapbu ló panderetas. Guiráyibu goyoʼ nakityibu portín ma bireʼyibu ló xomandary egipcios.