Israelitanakajj Egiptot mistupkäna ukhat pä phajjsi pasatatjja, Sinaí qolluruw puripjjäna, ukaruw campamentop uttʼayapjjarakïna. Jehová Diosajj uka qollur makatañapwa Moisesar mayïna. Ukatsti sänwa: ‘Nayaw israelitanakar Egiptot apsunta. Jupanakatï istʼapjjetani, leyinakajsa phoqapjjani ukhajja nayan ajllita markajäpjjaniwa’ sasa. Uka qollut saraqanisajja, Moisesajj Diosan arunakapwa israelitanakar yatiyäna. ¿Jupanakajj kamsapjjänsa? ‘Kuntï Jehová Diosajj siski taqe ukanakjja phoqapjjäwa’ sasaw sapjjäna.

Moisesajj wasitat qollur makatäna. Diosajj ukan akham sänwa: ‘Akat kimsïri urunwa markpachampi parläjja. Jupanakajj janiw aka qollur makatanipjjañapäkiti’ sasa. Moisesajj saraqanjjasajja, ‘Jehová Diosar istʼañatak wakichasipjjam’ sasaw israelitanakar säna.

Kimsïri urunjja, lliju llijunakampi chʼiyar qenayampi muyuntatwa israelitanakajj qollur uñjapjjäna. Ukatjja mä qʼejjo qʼejjon wali jachʼat suynatapa ukhamarak pututun phustʼasitapwa istʼapjjäna. Jehová Diosajj nina taypiw uka qollur saraqanïna. Israelitanakajj walpun ajjsarapjjäna. Uka qollojj chʼiyar jewqʼempi chhaqtayatänwa, wal khatatirakïna. Pututun phustʼasitapajj jukʼamp jukʼampiw jachʼat istʼasïna. Ukatsti Diosajj akham sänwa: ‘Nayaw Jehová Diosätjja. Janiw yaqha diosarojj adorapjjañamäkiti’ sasa.

Moisesajj mayampwa uka qollur makatäna, ukanwa Jehová Diosajj markatak leyinak churäna. Uka leyinakanwa kunjamsa adorapjjañapäna, kunjamsa sarnaqapjjañapäna ukanakajj qhanañchasïna. Uka leyinak qellqasasti Moisesajj israelitanakatakiw liytʼarapïna. Jupanakasti akham sapjjänwa: ‘Taqe kuntï Jehová Diosajj mayipkitu ukanakjja phoqapjjäwa’ sasa. Ukhamwa Jehová Diosar mä promesa lurapjjäna, ukampis ¿phoqapjjpachänti?