Bebee le sôñ iba i mbus manyodi map i Égiptô, bon ba Israel ba pam i Hikôa Sinai, ba oñ libôga jap. Yéhôva a sébél Môsé i ngii hikôa, a kal nye le: ‘Me bi tohol bon ba Israel. Ibale ba nôgôl me, ba tééda ki mambén mem, b’a yila litén jem li tôbôtôbô.’ Môsé a sôs hikôa, a kal bon ba Israel i jam Yéhôva a bi kal nye. Lelaa ba bi timbhe nye? Ba bi timbhe le: ‘D’a boñ mam momasôna Yéhôva a nkal bés.’

Môsé a bi témb a bet i ngii hikôa. Yéhôva a kal nye le: ‘Len dilo daa, m’a pôdôs we. Béhe litén le li noode bañ bet i ngii Hikôa Sinai.’ Môsé a bi sôs, a kal bon ba Israel le ba kôôba i emble Yéhôva.

I mbus dilo daa, bon ba Israel ba bi tehe nwegnwek ni ond i nhénd i ngii hikôa. Ba nok ki mbambat i mbam makeñi, ni kiñ hioñ. I mbus, Yéhôva a sôs ngii hikôa ikété hié. Bon ba Israel ba kon woñi ngandak kayéle ba kahal sehla. Hikôa hiosôna hi bé nyeñg ni ngui, hida hi hô ki hio. Kiñ hioñ i bé bet ndigi, bet ni bet. Ha nyen Djob a bi kal le: ‘Men me yé Yéhôva. Ni nlama bé bégés banyambe bape.’

Môsé a témb i ngii hikôa, Yéhôva a ti nye mambén inyu litén, ma ma bé unda lelaa ba nlama bégés Yéhôva, ni bimbe bilem ba nlama bana. Môsé a tila mambén ma, i mbus a añ mo bisu bi bon ba Israel. Ba bôn le: ‘D’a boñ mam momasôna Yéhôva a nkal bés.’ Ñ, ba bi bôn Djob ngim jam. Ndi baa ba bi yônôs jo?