Dua bulan dung kaluar sian Mesir, sahat ma halak Israel di Dolok Sinai jala berkemah ma nasida disi. Disuru Jahowa ma si Musa naek tu dolok. Didok Jahowa ma, ‘Nunga Hupalua halak Israel. Molo unduk nasida tu Ahu jala diulahon patikku, gabe bangsongku ma nasida.’ Turun ma si Musa jala dipaboa ma tu bangso Israel hata ni Jahowa. Songon dia do alus ni nasida? Dialusi bangso i ma, ‘Olo do hami mangulahon sude parenta ni Jahowa.’

Naek ma muse si Musa tu dolok. Didok Jahowa ma, ‘Tolu ari nai, naeng mangkatai Ahu tu ho. Paboa ma tu nasida asa unang adong na naek tu Dolok Sinai.’ Turun ma si Musa jala dipaboa ma tu bangso Israel asa siap-siap manangihon Jahowa.

Di ari patoluhon, diida nasida ma sillam dohot ombun na golap di dolok i. Dibege nasida ma muse soara ni ronggur dohot soara ni tarompet. Turun ma Jahowa tu dolok i di bagasan api. Mabiar situtu ma bangso Israel. Humutur ma dolok i jala gok ma timus di sekelilingna. Lam gogo ma soara ni tarompet i. Dung i didok Debata ma, ‘Ahu do Jahowa. Ndang boi hamu manomba debata na asing.’

Naek ma muse si Musa tu dolok i. Dilehon Jahowa ma patik tu bangso i. Marhite patik i diboto nasida ma cara manomba Jahowa jala marpangalaho na denggan. Disurathon si Musa ma i jala dijahahon tu halak Israel. Marjanji ma nasida tu Debata, ‘Sude parenta ni Jahowa, ulahononnami do.’ Alai diulahon nasida do i?