Samwe long tu manis afta we ol man Isrel oli lego Ijip, oli kamtru long hil ya Sinae, mo oli mekem kamp blong olgeta long stamba blong hil ya. Jehova i singaot Moses i kam antap long hil ya, mo i talem long hem se: ‘Mi nao mi sevem ol man Isrel. Taswe, sipos oli obei long ol loa blong mi, oli save kam ol nambawan man blong mi.’ Moses i godaon long hil ya, mo i talemaot ol tok blong Jehova long ol man Isrel. ?Ale, oli mekem wanem? Oli ansa se: ‘Bae mifala i mekem evri samting we Jehova i talem.’

Moses i go antap long hil bakegen, nao Jehova i talem long hem se: ‘Long namba tri dei, bae mi toktok long yu. Yu go talem long ol man se oli no mas traem kam antap long hil ya.’ Nao Moses i godaon bakegen, mo i talem long ol man Isrel se oli mas rere blong harem toktok blong Jehova.

Long namba tri dei, ol man Isrel oli luk bigfala laetning, mo tanda i faerap, mo bigfala klaod i kavremap hil ya, mo oli harem bigfala noes blong pupu. Nao Jehova i kamdaon, i stap antap long hil ya, we bigfala faea i laet raonabaot long hem. Ol man Isrel oli fraet tumas mo oli stap seksek. Bigfala smok i kavremap hil ya, mo i stap seksek. Noes blong pupu i stap kam bigwan moa. Nao God i talem se: ‘Mi mi Jehova. Yufala i no mas wosipim wan narafala god.’

Nao Moses i go antap long hil ya bakegen, mo Jehova i givim ol loa we hem i mas talemaot long ol man Isrel. Ol loa ya oli soemaot stret rod blong wosipim hem, mo ol gudfala fasin we oli mas folem. Moses i raetemdaon ol loa ya mo i ridim olgeta long ol man Isrel. Nao oli promes se: ‘Bae mifala i mekem evri samting we Jehova i talem.’ Oli mekem promes long God, ?be oli holem promes ya?