Ikọyọhọke ọfiọn̄ ita tọn̄ọ nditọ Israel ẹkewọn̄ọ ke Egypt, mmọ ẹma ẹdisịm Obot Sinai ẹnyụn̄ ẹdu do. Jehovah ama okot Moses ọdọk edi obot oro onyụn̄ ọdọhọ enye ete: ‘Ami n̄kanyan̄a nditọ Israel. Edieke mmọ ẹkopde uyo mi ẹnyụn̄ ẹnịmde ibet mi, mmọ ẹyedi san̄asan̄a ikọt mi.’ Moses ama osụhọde editịn̄ se Jehovah ọdọhọde ọnọ nditọ Israel. Mmọ ẹkedọhọ didie? Mmọ ẹma ẹdọhọ ẹte: ‘Iyanam kpukpru se Jehovah ọdọhọde.’

Moses ama afiak ọdọk obot oro. Jehovah ama ọdọhọ enye do ete: ‘Ke ọyọhọ usen ita, nyedi nditịn̄ ikọ ye mbufo. Dọhọ mmọ ẹkûdomo ndidọk ndi Obot Sinai.’ Moses ama osụhọde edidọhọ nditọ Israel ẹben̄e idem man ẹkop se Jehovah editịn̄de.

Ke ọyọhọ usen ita, nditọ Israel ẹma ẹkụt nte emịnen̄mịnen̄ asiahade, obubịt enyọn̄ onyụn̄ ofụkde obot oro. Mmọ ẹma ẹkop n̄ko ata ọkpọsọn̄ obuma ye uyom nnụk. Jehovah ama asan̄a ke ikan̄ osụhọde edi obot oro. Ndịk ama anam nditọ Israel tutu mmọ ẹnyek. Nsụn̄ikan̄ ama ọyọhọ ofụri obot oro, obot oro onyụn̄ enyek ata etieti. Uyom nnụk oro ama enen̄ede ọsọn̄. Ndien Abasi ọdọhọ ete: ‘Ami ndi Jehovah. Mbufo ẹkûkpono mme abasi en̄wen.’

Moses ama afiak ọdọk obot oro, ndien Jehovah ama ọnọ enye ibet ada ọsọk nditọ Israel. Ibet oro akaban̄a nte mmọ ẹkpetuakde ibuot ẹnọ Jehovah ye nte mmọ ẹkpedude uwem. Moses ama ewet ibet oro onyụn̄ emen mmọ okokot ọnọ nditọ Israel. Mmọ ẹma ẹn̄wọn̄ọ ẹte: ‘Iyanam kpukpru se Jehovah ọdọhọde.’ Edi, ndi mmọ ẹyenam se mmọ ẹken̄wọn̄ọde oro?