Piama kashi süchikijee noʼunuin na israeliitakana Egiptojee, antüshii naya eemüin tü uuchikat Sinaí jee makataka naya yala. Nuʼunakalaka Moisés nümüiwaʼa süraloʼumüin tü uuchikat. «Toʼtteʼerüin na israeliitakana. Müleka noonoole sümaa tanüiki jee naaʼinrüle tü taluwataakalü anain naya, taneekeena naya süpüla nayainjanain tapueulosein», nümaka Jeʼwaa nümüin. Nüshakatapa Moisés saaʼujee tü uuchikat, nüküjain namüin na israeliitakana tü nümakat Jeʼwaa. ¿Jamakaʼa nanüiki nümüin Moisés? «Waaʼinreerü süpüshuaʼa tü kasa nuluwataakalü anain waya Jeʼwaa» müshii naya.

Nuʼunaka mapa nüchikuaʼa Moisés süraloʼumüin tü uuchikat. «Soʼu apünüin kaʼi taküjeerü sümüin tü pueulokot wanee kasa. Paapira tü wayuukalüirua suulia noʼunuin saaʼumüin tü uuchikat Sinaí», nümaka Jeʼwaa nümüin. Nüshakatapa Moisés saaʼujee tü uuchikat, nüküjain namüin na israeliitakana yapainjanain naya süpüla naapajüin nünüiki Jeʼwaa.

Sülatapa apünüin kaʼi, neʼrüin na israeliitakana shiyaa juya jee süsirumajaaka chaa saaʼu tü uuchikat. Naapaka sütüttüin tü juyakat jee shiʼyalajinnüin suʼuwa paaʼa. Neʼraka suchuwajaain iipünaajee tü nüpülainkat Jeʼwaa. Ayoʼujaasü maʼin naaʼin na israeliitakana. Kaituuisü saaʼupünaa tü uuchikat jee akutkujaasü tü mmakat. Otta emetutsü maʼin tü shiʼirakat suʼuwa paaʼa.

Nuʼunaka nüchikuaʼa Moisés süraloʼumüin tü uuchikat nüküjaka Jeʼwaa nümüin tü naaʼinrüinjatkat na israeliitakana süpüla naʼwaajüin nia jee jamüinjatüin nakuwaʼipa. Nüshajaka Moisés tia jee naashajeʼeraka shia namüin na israeliitakana. «Waaʼinreerü süpüshuaʼa tü nuluwataakalü anain waya Jeʼwaa», namakalaka nümüin Moisés.