Nudi osun awe to whenue Islaelivi lẹ ko tọ́n sọn Egipti godo, yé wá osó Sinai kọ̀n bo whèsla do finẹ. Jehovah ylọ Mose wá osó lọ ji bo dọna ẹn dọ: ‘N’whlẹn Islaelivi lẹ. Eyin yé setonuna mi bo yìn osẹ́n ṣie lẹ, yé na lẹzun akọta vonọtaun de na mi.’ Mose jẹte yì Islaelivi lẹ dè bo dọ nuhe Jehovah ko dọna ẹn lẹ na yé. Nawẹ yé yinuwa gbọn? Yé gblọn dọmọ: ‘Nuhe Jehovah dọ mí ni wà lẹpo wẹ mí na wà.’

Mose sọ vọ́ hẹji yì osó lọ ji. Jehovah dọna ẹn dọ: ‘To azán atọ̀n gbè, n’na dọhona mì. Na avase mẹlẹ dọ yé ni ma tẹnpọn nado hẹ Osó Sinai ji blo.’ Mose jẹte bo dọna Islaelivi lẹ dọ yé ni wleawudai nado sè nuhe Jehovah na dọ.

To azán atọ̀n godo, Islaelivi lẹ mọdọ abì to gbigbòdlán to osó lọ ji bọ aslọ titli de sọawuhia to e ji. Yé sọ sè nudidọ hẹviosò tọn bọ opẹ̀n de dọnú gángán. Enẹgodo, Jehovah jẹte wá osó lọ ji to miyọ́n mẹ. Budi Islaelivi lẹ sọmọ bọ yé jẹ sisọsisọ ji. Osó lọ blebu jẹ whinwhàn ji sinsinyẹn bọ azọ̀ sọ gọ́ e ji. Nudidọ opẹ̀n tọn lọ sọ fọ́n bo to sinsinyẹn deji. To whenẹnu, Jiwheyẹwhe dọmọ: ‘Yẹn wẹ Jehovah. Mì ma dona sẹ̀n yẹwhe devo depope.’

Mose lẹkọyi osó lọ ji bọ Jehovah na ẹn osẹ́n lẹ gando lehe omẹ etọn lẹ dona nọ sẹ̀n Ẹn bo nọ yinuwa do go. Mose kàn osẹ́n lọ lẹ dai bo wá hia yé na Islaelivi lẹ. Yé sọ dopà dọ: ‘Nuhe Jehovah dọ mí ni wà lẹpo wẹ mí na wà.’ Mọwẹ, yé dopà na Jiwheyẹwhe. Amọ́, be yé na depà yetọn ya?